जनकपुरधाममा देउवा पक्षले आयोजना गरेको मधेश प्रदेश स्तरीय कार्यकर्ता भेलालाई सम्बोधन गर्दै नेपाली कांग्रेसका पूर्वउपसभापति बिमलेन्द्र निधिले पार्टीको १५औं महाधिवेशन सफलतापूर्वक सम्पन्न गर्न सबै पक्षबीच एकता अपरिहार्य रहेको बताएका छन्। उनले पार्टीभित्रको गुट उपगुट अन्त्य गरी एकताको माध्यमबाट अगाडि बढ्नुपर्नेमा जोड दिए।
निधिले विशेष महाधिवेशन पक्षधर र सो अधिवेशनमा भाग नलिएकाहरूबीचको एकतालाई १५औं महाधिवेशनको सफलताका लागि महत्वपूर्ण मानेका छन्। पार्टीभित्र पक्ष विपक्षभन्दा मिलेर जानुपर्ने उनको भनाइ थियो।
नेता निधिले महाधिवेशनका लागि क्रियाशील सदस्यता आवश्यक भए पनि एकतर्फी रूपमा नामावली तयार गर्नु अनुचित भएको धारणा राखे। विगतमा तयार भइसकेको नामावलीलाई मान्यता दिनुपर्ने उनको माग छ। क्रियाशील सदस्यता नवीकरणका नाममा पार्टीको एक पक्षले धाँधली गर्ने दुराशयका साथ अद्यावधिक गर्दै हिँडेको उनले गुनासो गरे।
उनले १५औं महाधिवेशन सफल पार्नका लागि १४औं महाधिवेशन र विशेष महाधिवेशनका केन्द्रीय समितिलाई एक बनाएर अगाडि बढ्नुपर्ने प्रस्ताव गरे। यसका साथै, क्रियाशील सदस्यता छानबिन समिति, निर्वाचन समिति र अनुशासन समिति सहमतिमा गठन गरेर महाधिवेशन प्रक्रिया अगाडि बढाउनुपर्ने उनको सुझाव छ।
नेता निधिले भातृ संगठन र सुभेच्छुक संगठनहरूलाई पुनः गठन गर्नुपर्नेमा पनि जोड दिए। उनले अनावश्यक प्रतिशोधका साथ पार्टी सञ्चालन गर्न नखोज्न नेपाली कांग्रेसको गगन पक्षलाई चेतावनी दिए। राजनीतिक रूपमा कांग्रेसभित्र एकताको आवश्यकता रहेको र सहमतिमै महाधिवेशन सम्पन्न गर्नु नै एकमात्र विकल्प रहेको उनले बताए।
