कोशी प्रदेशको आर्थिक वृद्धिदर चालू आर्थिक वर्ष २०८२/८३ मा ३.१३ प्रतिशत पुग्ने अनुमान छ। गत आर्थिक वर्ष २०८१/८२ मा यो वृद्धिदर २.७२ प्रतिशत थियो। प्रदेशसभामा पेस गरिएको आर्थिक सर्वेक्षण प्रतिवेदन अनुसार, प्रादेशिक कुल गार्हस्थ्य उत्पादनमा कृषि क्षेत्रको योगदान ३२.५ प्रतिशत र गैर/कृषि क्षेत्रको ६७.५ प्रतिशत रहनेछ।
यस अवधिमा कृषि र गैर/कृषि क्षेत्रको उत्पादन विस्तार क्रमशः २.१ प्रतिशत र ३.५ प्रतिशतले हुने प्रक्षेपण छ। सेवा क्षेत्रको योगदान ४९.८ प्रतिशत रहनेछ भने औद्योगिक क्षेत्रको १७.७ प्रतिशत रहने देखिएको छ। कोशी प्रदेशको प्रतिव्यक्ति आम्दानी १,४१० अमेरिकी डलर रहने अनुमान छ। यो नेपालको औसत प्रतिव्यक्ति कुल गार्हस्थ्य उत्पादन १,५१३ अमेरिकी डलरभन्दा कम हो।
आर्थिक वर्ष २०८१/८२ मा प्रदेशको कुल राजस्व संकलन १९.४ प्रतिशतले वृद्धि भयो। कुल आयमा आन्तरिक राजस्वको अनुपात १४.५ प्रतिशत पुगेको छ। प्रदेशको कुल प्रादेशिक आय ३३ अर्ब ६६ करोड रुपैयाँ पुगेको छ, जुन अघिल्लो वर्षको तुलनामा ४.४ प्रतिशतले बढी हो। खर्च भने २८ अर्ब १८ करोड रुपैयाँ पुगेको छ।
आर्थिक वर्ष २०८१/८२ मा विनियोजित कुल बजेटको ७९.९ प्रतिशत र पुँजीगत बजेटको ७९.३० प्रतिशत खर्च भएको छ। कुल खर्चमा चालू खर्च ३६ प्रतिशत, पुँजीगत खर्च ४९ प्रतिशत र स्थानीय तह अनुदान १५ प्रतिशत रहेको छ। चालू आर्थिक वर्ष २०८२/८३ को वैशाख मसान्तसम्म कुल प्रादेशिक खर्च १३ अर्ब ७ करोड ११ लाख रुपैयाँ भएको छ।
सुशासनका दृष्टिले कोशी प्रदेशले बेरुजु फर्छ्यौटमा प्रगति गरेको छ। आर्थिक वर्ष २०८१/८२ को अन्त्यमा प्रदेशको बेरुजु ५८ करोड ६७ लाख रुपैयाँ मात्र छ। यो अघिल्लो वर्षको ८६ करोड ८२ लाख रुपैयाँ भन्दा कम हो।
प्रदेशमा बैंकिङ तथा वित्तीय संस्थाका शाखाहरू १ हजार ८४६ पुगेका छन्। मोबाइल बैंकिङ सेवा लिने ग्राहक ४२ लाख १९ हजार छन्। १ हजार ६२ सहकारीमा १३ लाख ८८ हजार ७ सय १० जना व्यक्ति आबद्ध छन्। ७ हजार ३ सय ५४ जनाले प्रत्यक्ष रोजगारी पाएका छन्।
बीमा क्षेत्रमा १९ लाख २ हजार ७४३ जीवन बीमा र २ लाख ७३ हजार ५५७ निर्जीवन बीमालेख जारी भएका छन्। यो देशको कुल बीमा पोलिसीको १६ प्रतिशत हो। बीमा प्रिमियम बापत १७ अर्ब ८८ करोड रुपैयाँ सङ्कलन भएको छ।
प्रदेशमा निरपेक्ष गरिबीको रेखामुनि १७.२ प्रतिशत जनसंख्या छ। यो राष्ट्रिय औसत २०.२७ प्रतिशत भन्दा कम हो। धान खेती ३ लाख २८ हजार १ सय ८३ हेक्टर क्षेत्रफलमा गरिएको छ। उत्पादकत्व ४.४५ प्रतिशत रहने प्रक्षेपण छ।
भौतिक पूर्वाधारतर्फ ७११ कि.मी. कालोपत्रे सडक, १५६६.२७ कि.मी. ग्राभेल सडक र १३८२.९५ कि.मी. कच्ची सडक निर्माण भएको छ। ११२ सडक पुल र २५९ झोलुङ्गे पुल सञ्चालनमा छन्। ९९.५ प्रतिशत जनसंख्यामा विद्युतको पहुँच पुगेको छ। प्रदेशको योगदान ७ सय ९७ मेगावाट छ।
शिक्षा क्षेत्रमा कक्षा ११/१२ को खुद भर्नादर २२.४ प्रतिशत छ। प्रदेशबासीको औसत आयु ७०.४ वर्ष छ। २८ लाख ८५ हजार २ सय ७५ जना नागरिक स्वास्थ्य बीमामा आबद्ध छन्। खानेपानी तथा सरसफाइको पहुँच क्रमशः ९३.२० प्रतिशत र ९८ प्रतिशत छ।
