कैलालीको गोदावरी नगरपालिका–४ गाईबाँधेमा ट्याम्पोलाई भीरबाट खसालेको घटनामा १० जना वन कर्मचारी पक्राउ परेका छन्। जिल्ला प्रहरी कार्यालय कैलालीले ६ जना र इलाका प्रहरी कार्यालय मालाखेतीले ४ जनालाई नियन्त्रणमा लिएको छ।
ट्याम्पो खसालेको भिडियो भाइरल भएपछि प्रधानमन्त्री कार्यालय र गृह मन्त्रालयले समेत चासो देखाएको थियो। प्रहरी स्रोतका अनुसार सोधपुछका लागि १० जनालाई नियन्त्रणमा लिइएको हो।
पक्राउ परेका सबै १० जना वन रक्षक र जुनियर कर्मचारी हुन्। जिल्ला वन अधिकृत (डीएफओ) रामविचारी ठाकुरसहित उच्च पदस्थ कर्मचारीहरू भने जिल्ला प्रशासन कार्यालय कैलालीमा छलफलमा जुटेका छन्।
वन क्षेत्रको जग्गा अतिक्रमण गरी ट्याम्पोमा खोका पसल सञ्चालन गरिरहेको अवस्थामा देखिएपछि उक्त ट्याम्पो हटाइएको थियो। जिल्ला वन कार्यालय कैलालीले ट्याम्पो हटाउने क्रममा भीरमा खसेको स्पष्टीकरण दिएको छ।
