काठमाडौँ। ‘जेनजी’ (Gen-Z) आन्दोलनका क्रममा भएको दमन र मानवीय क्षतिको छानबिन गरिरहेको उच्चस्तरीय आयोगले दोषीलाई कारबाहीको सिफारिस मात्र नगरेर, संकटको घडीमा उत्कृष्ट कार्य गर्नेहरूलाई पुरस्कृत गर्न पनि सुझाव दिएको छ। गौरीबहादुर कार्की नेतृत्वको जाँचबुझ आयोगले आफ्नो प्रतिवेदनमा ६ जना प्रहरी अधिकृत तथा जवान र २ जना सर्वसाधारण नागरिकलाई पुरस्कार प्रदान गर्न सरकारसमक्ष सिफारिस गरेको हो।
आयोगका अनुसार आन्दोलनका क्रममा परिस्थिति नियन्त्रण बाहिर जान लाग्दा संयमता अपनाएका र मानवीय क्षति कम गर्न सक्रिय भूमिका खेलेका ६ जना प्रहरीलाई उनीहरूको कार्यदक्षताको कदर गर्दै पुरस्कृत गर्नुपर्ने देखिएको छ। ती प्रहरीहरूले कठिन समयमा पनि व्यावसायिक मर्यादा कायम राखेको आयोगको ठहर छ।
प्रहरीलाई जोगाउने ती दुई नागरिक: प्रतिवेदनको सबैभन्दा प्रशंसनीय पक्ष भनेको दुई जना सर्वसाधारण नागरिकको भूमिका हो। आन्दोलनकारी र प्रहरीबीच झडप भइरहेका बेला आक्रोशित भीडबाट प्रहरीको ज्यान जोगाउन र उनीहरूलाई सुरक्षित स्थानमा पुर्याउन ती नागरिकले महत्वपूर्ण सहयोग गरेको आयोगले जनाएको छ। “सुरक्षाकर्मी र नागरिकबीचको सम्बन्धलाई मानवीयताका आधारमा प्रगाढ बनाउन यस्ता व्यक्तिहरूको सम्मान हुनु जरुरी छ,” प्रतिवेदनमा भनिएको छ।
यसअघि तत्कालीन प्रधानमन्त्री केपी शर्मा ओली र गृहमन्त्री रमेश लेखक लगायत उच्च नेतृत्वमाथि अनुसन्धानको माग गरेको आयोगले तल्लो तहका कर्मचारी र सहयोगी नागरिकलाई प्रोत्साहन गर्दा राज्यको न्याय प्रणालीप्रति विश्वास बढ्ने अपेक्षा राखेको छ।