काठमाडौँ। ‘जेनजी’ (Gen-Z) आन्दोलनको अनुसन्धान गरिरहेको उच्चस्तरीय जाँचबुझ आयोगसमक्ष अर्को एउटा महत्त्वपूर्ण बयान आएको छ। टिबेटियन ओरिजिनल ब्लड (TOB) का अध्यक्ष तेन्जिन दावा लामाले गत भदौमा भएको उक्त विवादास्पद र हिंसात्मक आन्दोलनमा आफ्नो सक्रिय सहभागिता रहेको स्वीकार गरेका छन्।
अनलाइनखबरले उल्लेख गरे अनुसार, गौरीबहादुर कार्की नेतृत्वको आयोगसमक्ष बयान दिने क्रममा लामाले आफू र आफ्नो संस्थाका सदस्यहरू उक्त आन्दोलनका क्रममा सडकमा उत्रिएको बताएका हुन्। यसअघि नै आयोगले तत्कालीन प्रधानमन्त्री केपी शर्मा ओली र गृहमन्त्री रमेश लेखकमाथि अनुसन्धान गर्न सिफारिस गरिसकेको पृष्ठभूमिमा, आन्दोलनको भित्री तयारी र परिचालनमा संलग्न पक्षहरूको पहिचान हुनुलाई अर्थपूर्ण मानिएको छ।
आन्दोलनमा TOB को भूमिका के थियो? लामाको यो स्वीकारोक्तिले जेनजी आन्दोलन केवल छिटपुट युवाहरूको आक्रोश मात्र नभई केही संगठित समूहहरूको पनि परिचालन रहेको संकेत गरेको छ। बयानका क्रममा उनले आन्दोलनमा आफ्नो उपस्थितिको उद्देश्य र त्यस क्रममा भएका गतिविधिबारे पनि स्पष्ट पारेको बुझिएको छ। यद्यपि, आन्दोलन हिंसात्मक बन्नुमा आफ्नो संस्थाको भूमिका थियो वा थिएन भन्नेबारे थप अनुसन्धान जारी रहने देखिएको छ।