काठमाडौं । काठमाडौंको शंखमुलस्थित एक होटलको गेटमा सजावटका लागि राखिएको ‘तामाको गाग्री’ दिउँसै चोरी भएको घटनाको सिसिटिभी (CCTV) फुटेज सार्वजनिक भएको छ।
सामाजिक सञ्जालमा भाइरल भइरहेको उक्त फुटेजमा चोरले चोरीका लागि स्कुटर प्रयोग गरेको स्पष्ट देखिन्छ। सार्वजनिक दृश्यमा देखिएअनुसार, चोरले सडकपेटीमै आफ्नो स्कुटर रोकेको छ र हेलमेट लगाएर स्कुटरमै बसिरहेकै अवस्थामा होटलको गेटमा रहेको तामाको गाग्री सजिलै उठाएर भागेको छ।
दिउँसोको व्यस्त समय र मानिसहरूको आवतजावत भइरहेकै बेला सो व्यक्तिले यसरी निर्धक्क चोरी गरेको दृश्य सिसिटिभीमा कैद भएको हो। यसअघि नै होटल सञ्चालकले गेटको शोभा बढाउन राखिएको उक्त परम्परागत गाग्री चोरी हुनुले सुरक्षा व्यवस्थामाथि चुनौती थपेको बताएका थिए।
सार्वजनिक भएको सिसिटिभी फुटेजले अनुसन्धानमा थप सहयोग पुग्ने विश्वास गरिएको छ। प्रहरीले घटनाको अनुसन्धान र चोरीमा संलग्न स्कुटर तथा व्यक्तिको खोजी कार्य तीव्र पारेको जनाएको छ।
#NMKhabar #NMKhabarUpdate #Kathmandu #Shankhamul #NepalNews #CrimeNewsNepal #NepaliNews
