नेपाली क्रिकेट अब दक्षिण एसिया र खाडी मुलुकको घेरा तोडेर युरोपको मैदानसम्म पुगेको छ। पहिलोपटक आयोजना हुन लागेको युरोपेली फ्रेन्चाइज क्रिकेट ‘इयू टी-२० लिग बेल्जियम’ मा नेपालका कप्तान रोहित पौडेल, उपकप्तान दीपेन्द्र सिंह ऐरी र सन्दीप लामिछानेसहित ८ जना नेपाली स्टारहरू एकैपटक अनुबन्धित भएका छन्। नेपाली क्रिकेट इतिहासमै यति धेरै खेलाडी एकैपटक युरोपियन लिगमा छनोट भएको यो पहिलो र ऐतिहासिक क्षण हो।
हालै सम्पन्न खेलाडीको ‘ड्राफ्ट’ र ‘प्रि-साइन’ प्रक्रियामार्फत नेपालका ८ खेलाडीले बेल्जियमका विभिन्न क्लबमा आफ्नो स्थान पक्का गरेका हुन्।
- कप्तान रोहित पौडेल: ‘गेन्ट ग्लाडियटर्स’ मा क्याटेगोरी ‘बी’ बाट छनोट।
- उपकप्तान दीपेन्द्र सिंह ऐरी: ‘जेबी ब्रुग्स’ मा प्रि-साइन।
- सन्दीप लामिछाने: ‘लियेज रेड लायन्स’ मा प्रि-साइन।
- आसिफ शेख: ‘एन्टवर्प एंकर्स’ मा क्याटेगोरी ‘सी’ बाट छनोट।
- ललित राजवंशी र इशान पान्डे: ‘जेबी ब्रुग्स’ बाट ड्राफ्ट।
- अनिल साह र गुल्शन झा: ‘जेबी ब्रुग्स’ मा अप्सनल (वैकल्पिक) राउन्डबाट छनोट।
विशेषगरी नेपाली व्यवस्थापन रहेको ‘ड्रिम स्पोर्ट्स’ को स्वामित्वमा रहेको ‘जेबी ब्रुग्स’ ले मात्रै ५ जना नेपाली खेलाडीलाई आफ्नो टोलीमा समेटेको छ।
क्रिकेट बेल्जियमको आयोजनामा आगामी मे ३० देखि जुन ७ (२०२६) सम्म यो लिग सञ्चालन हुँदैछ। यसअघि सन्दीप लामिछाने, दीपेन्द्र सिंह ऐरी र रोहित पौडेलले क्यानडा, यूएई र अन्य देशका ग्लोबल फ्रेन्चाइज लिग खेलिसकेका छन्। तर, ललित, आसिफ, इशान, अनिल र गुल्शनका लागि भने यो नेपालबाहिरको फ्रेन्चाइज लिग खेल्ने पहिलो र ठूलो अन्तर्राष्ट्रिय अवसर हुनेछ।
गाउँको धुले मैदानमा काठको ब्याटले क्रिकेट खेल्दै हुर्किएका हजारौं नेपाली युवाहरूका लागि यो समाचारले ठूलो ऊर्जा दिएको छ। नेपाली खेलाडीले पनि अब युरोपियन लिगमा विदेशी स्टारहरूसँगै काँधमा काँध मिलाएर खेल्न र डलरमा कमाउन सक्छन् भन्ने प्रमाणित भएको छ। यसले क्रिकेटलाई एउटा सुरक्षित र अन्तर्राष्ट्रिय स्तरको करियर बनाउन सकिन्छ भन्ने विश्वास तल्लो तहसम्म पुर्याएको छ। यो सिङ्गो देशको गौरवको विषय हो।
अब सबैको नजर मे महिनाको अन्त्यमा हुने प्रतियोगितामा टिकेको छ। युरोपको पिचमा नेपाली खेलाडीले कस्तो प्रदर्शन गर्छन् र उनीहरूले विदेशी खेलाडीलाई कसरी टक्कर दिन्छन् भन्ने कुराले आगामी दिनमा अन्य युरोपेली लिगहरूमा नेपाली खेलाडीको ढोका खोल्नेछ। यदि उनीहरूले त्यहाँ उत्कृष्ट प्रदर्शन गरे भने, नेपाली क्रिकेटको बजार विश्वव्यापी रूपमा झनै विस्तार हुने निश्चित छ।
