काठमाडौं । पूर्व गृहमन्त्री नारायणकाजी श्रेष्ठले सडकआश्रित नागरिक व्यवस्थापनमा राज्य पूर्णतः असफल भएको स्वीकार गरेका छन्। काठमाडौँ महानगरपालिकालाई ‘सडकआश्रित मानवमुक्त’ घोषणा गर्ने कार्यक्रममा बोल्दै उनले आफू जिम्मेवार पदमा रहँदा यो अवस्था आएको भन्दै नेपाली जनतासँग माफी मागे।
श्रेष्ठले सामाजिक–आर्थिक रूपान्तरण, विकास र समृद्धिका क्षेत्रमा राज्यले पर्याप्त काम गर्न नसकेको बताए। उनले भने, ‘राज्यले सामाजिक आर्थिक रुपान्तरण, विकास र समृद्धिसहितका कुरामा फड्को मार्नेदेखि यस क्षेत्रमा जति काम गर्नुपर्ने थियो गर्न सकेन।’
उनले आफू स्वयंलाई पनि एक हदसम्म जिम्मेवार ठहराउँदै नेपाली जनतासामू आत्मआलोचना गर्न चाहेको र माफी माग्न चाहेको बताए। अब सबै मिलेर यो कामलाई अगाडि बढाउनुपर्नेमा उनको जोड छ। विगतका कमीकमजोरी स्वीकार्दै सबै पक्षको सहकार्यमा नागरिकलाई सम्मानजनक जीवनयापनको वातावरण सिर्जना गर्नुपर्नेमा श्रेष्ठले जोड दिए।
