नागढुङ्गा–सिस्नेखोला सुरुङमार्ग साउनको तेस्रो सातादेखि सञ्चालनमा आउने भएको छ। आयोजना प्रमुख सौजन्य नेपालले आवश्यक तयारी अन्तिम चरणमा पुगेको बताए।
आयोजना प्रमुख नेपालका अनुसार सुरुङ सञ्चालनका लागि सबै तयारी भइरहेका छन्। साउनभित्रै आयोजना सञ्चालनमा ल्याउने लक्ष्य छ। सवारीसाधनबाट शुल्क उठाउने कम्पनीसँग सम्झौता भई तालिम र प्राविधिक काम भइरहेको छ।
सुरुङमार्गभित्र उद्धार, आपत्कालीन व्यवस्थापन, प्रकाश र भेन्टिलेसन प्रणालीको तयारीबारे शुल्क उठाउने कम्पनीले काम गरिरहेको छ। चौबीसै घण्टा सञ्चालनका लागि १५० कर्मचारी भर्ना गरिसकिएको छ। यी कर्मचारीलाई सिफ्टमा परिचालन गरिनेछ।
राष्ट्रिय सभाको सार्वजनिक नीति तथा प्रत्योजित विधायन समितिको बैठकमा आयोजना प्रमुख नेपालले आयोजनाको ९९.५ प्रतिशत भौतिक प्रगति भएको जानकारी दिए। वित्तीय प्रगति ९६ प्रतिशत छ।
सुरुङमार्ग सञ्चालन तथा व्यवस्थापनका लागि आयोजना र सेवा प्रदायक युसिन–एआरटी जेभीबीच पाँच वर्षका लागि सम्झौता भएको छ। सेवा प्रदायकले सुरुङको सिभिल, मेकानिकल, इलेक्ट्रिकल र सुरक्षा प्रणालीको रेखदेख र मर्मत गर्नेछ।
यो सुरुङमार्ग सञ्चालनमा आएपछि नागढुङ्गा–नौबिसे सडकखण्डको लामो र घुमाउरो यात्रा छोटिनेछ। मुख्य सुरुङमार्ग २,६८८ मिटर लामो छ। आपत्कालीन सुरुङ २,५५७ मिटर लामो छ।
आयोजनाले दैनिक आठ हजार सवारीसाधन सुरुङमार्ग प्रयोग गर्ने अनुमान गरेको छ। यसबाट वार्षिक करिब ३५ करोड रुपैयाँ राजस्व संकलन हुनेछ। वार्षिक २२ करोड रुपैयाँ सेवा प्रदायकलाई भुक्तानी गरिनेछ। यो पाँच वर्षका लागि एक अर्ब १० करोड रुपैयाँ हुन आउँछ।
शुल्क संकलनका लागि विशेष प्राविधिक उपकरण जडान गरिएको छ। संकलित रकम सडक बोर्ड नेपालको खातामा जम्मा हुनेछ।
समितिको बैठकमा सांसदहरूले आयोजना सञ्चालनमा भइरहेको ढिलाइप्रति आपत्ति जनाए। उनीहरूले कोभिड–१९ र प्राकृतिक विपद्जस्ता कारणले ढिलाइ भए पनि यथाशीघ्र सञ्चालन गर्नुपर्नेमा जोड दिए।
