स्वास्थ्य तथा खाद्य स्वच्छता मन्त्रालयमा अब एक जना मात्र सचिव रहने व्यवस्था लागू भएको छ। सरकारले मन्त्रालयको संख्या २२ बाट घटाएर १८ कायम गरेसँगै यो निर्णय कार्यान्वयनमा आएको हो।
नेपाल सरकारको कार्य विभाजन नियमावली, २०८३ अनुसार सचिवहरूको दरबन्दी मिलान गरिएको हो। यसअघि मन्त्रालयमा स्वास्थ्य सेवा र प्रशासनतर्फ गरी दुई सचिवको दरबन्दी थियो।
नयाँ व्यवस्थाअनुसार स्वास्थ्य सेवातर्फका सचिव डा. विकास देवकोटाले मन्त्रालयको सम्पूर्ण प्रशासनिक तथा प्राविधिक जिम्मेवारी सम्हाल्नेछन्। प्रशासनतर्फका सचिव डिल्ली शर्मालाई भने प्रधानमन्त्री तथा मन्त्रिपरिषद्को कार्यालयमा सरुवा गरिएको छ।
सोमबार नै शर्माको मन्त्रालयबाट औपचारिक बिदाइ गरिएको थियो। यससँगै स्वास्थ्य मन्त्रालयको नेतृत्व अब डा. देवकोटाको काँधमा केन्द्रित भएको छ।
