लुम्बिनी प्रदेश सरकारको मन्त्रिपरिषद् बैठकले स्वास्थ्यमन्त्री रामजीप्रसाद घिमिरेलाई प्रदेश सरकारको प्रवक्ताको जिम्मेवारी तोकेको छ। मुख्यमन्त्री चेतनारायण आचार्यको अध्यक्षतामा सोमबार बसेको बैठकले यो निर्णय गरेको हो।
बैठकले मुख्यमन्त्री तथा मन्त्रिपरिषद् कार्यालयबाट पेस भएको अध्ययन पूर्व स्वीकृति तथा अध्ययन बिदा स्वीकृतिसम्बन्धी कार्यविधि, २०८३ स्वीकृत गर्यो। बर्दिया अस्पताल, गुलरियामा मेडिकल जनरलिस्ट डा. सुवास पाण्डेलाई एघारौँ तहमा पदस्थापन गर्ने निर्णय पनि बैठकले गर्यो।
सामाजिक विकास मन्त्रालयको सडक आश्रित मानव व्यवस्थापन कार्यविधि, २०८३ लाई कानुन सचिवको परामर्शपछि स्वीकृत गर्ने निर्णय भयो।
सरकारका प्रवक्ता घिमिरेका अनुसार, मुख्यमन्त्री आचार्यले आगामी आर्थिक वर्षको बजेट सन्तुलित, यथार्थपरक र परिणाममुखी बनाउन मन्त्रीहरूलाई निर्देशन दिए।
