जनकपुरधाममा मिर्गौला रोग उपचार केन्द्र स्थापना गर्न सम्भाव्यता अध्ययन समितिले सिफारिस गरेको छ। यसले मधेश प्रदेशमा विशेषज्ञ मिर्गौला उपचार सेवाको पहुँच विस्तार गर्नेछ।
समितिले प्राविधिक, पूर्वाधार, जनशक्ति, आर्थिक तथा सामाजिक पक्षको अध्ययनपछि संघ र प्रदेश सरकारको सहकार्यमा मधेश स्वास्थ्य विज्ञान प्रतिष्ठान, जनकपुरबाट केन्द्र सञ्चालन गर्न उपयुक्त हुने निष्कर्ष निकालेको हो।
स्वास्थ्य तथा खाद्य स्वच्छता मन्त्रालयले गठन गरेको समितिले धनुषाको जनकपुर उपमहानगरपालिका मुजेलियामा सार्वजनिक मोडल अन्तर्गत केन्द्र स्थापनाको प्रस्ताव गरेको छ।
प्रस्तावित केन्द्रलाई मध्यमकालीन (६–१० वर्ष) परियोजनाका रूपमा अघि बढाउने तथा स्वास्थ्य क्षेत्रअन्तर्गत प्राथमिकता प्राप्त आयोजनाका रूपमा कार्यान्वयन गर्ने उल्लेख छ।
आर्थिक वर्ष २०८२/८३ को बजेट तथा कार्यक्रममा क्यान्सर तथा मिर्गौला प्रत्यारोपणजस्ता जटिल उपचार सेवा प्रदेशस्तरमा विस्तार गर्ने लक्ष्य छ। यसैअनुसार वरिष्ठ कन्सल्टेन्ट नेफ्रोलोजिस्ट डा. विक्रम वीर वज्राचार्यको संयोजकत्वमा समिति गठन भएको थियो।
समितिमा डा. कल्पना कुमारी श्रेष्ठ, डा. धिरज नारायण मानन्धर, डा. हेमन्त चन्द्र ओझा तथा मन्त्रालयका उपसचिव ईश्वरीप्रसाद ढकाल (सदस्य–सचिव) सदस्य थिए।
समितिले मधेश प्रदेश सरकारको स्वास्थ्य तथा जनसंख्या मन्त्रालय, मधेश स्वास्थ्य विज्ञान प्रतिष्ठान, बर्दिबास नगर अस्पताल, गजेन्द्र नारायण सिंह अस्पताल, रामकुमार शारडा उमाप्रसाद मुरारका प्रादेशिक अस्पताल, प्रादेशिक अस्पताल मलंगवा तथा नारायणी अस्पतालको स्थलगत अध्ययन गरेको थियो। सरोकारवालासँग छलफल र प्राविधिक मूल्याङ्कनपछि प्रतिवेदन तयार पारिएको हो।
प्रतिवेदनअनुसार नेपालमा करिब ६.२ प्रतिशत जनसंख्या मिर्गौला रोगबाट प्रभावित छन्। मधेश प्रदेशमा निकै कम नेफ्रोलोजिस्ट कार्यरत छन्। प्रदेशमा हेमोडायलाइसिस मेसिन, विशेषज्ञ सेवा र मिर्गौला प्रत्यारोपण सेवाको पहुँच सीमित छ। अधिकांश बिरामी उपचारका लागि काठमाडौं तथा अन्य प्रदेश धाउनुपर्ने अवस्था छ।
समितिले केन्द्र सञ्चालनका लागि संघ, प्रदेश तथा संघ–प्रदेश सहकार्यका तीन मोडल अध्ययन गरेको थियो। संघ र प्रदेश सरकारको सहकार्यमा सञ्चालन हुने मोडललाई सबैभन्दा उपयुक्त ठहर गर्दै मधेश स्वास्थ्य विज्ञान प्रतिष्ठानमार्फत सञ्चालन गर्न सिफारिस गरिएको छ। यस मोडलबाट स्रोत व्यवस्थापन, विशेषज्ञ जनशक्ति परिचालन र सेवाको दिगोपना सुनिश्चित गर्न सहज हुने उल्लेख छ।
प्रस्तावअनुसार केन्द्रको कार्यान्वयन तथा व्यवस्थापनका लागि स्वास्थ्य मन्त्रालयको नेतृत्वमा अस्पताल विकास समिति गठन गरी परियोजना अघि बढाउने अवधारणा प्रस्तुत गरिएको छ।
जनकपुरमा मिर्गौला उपचार केन्द्र स्थापना भए मधेश प्रदेशका बिरामीले आफ्नै प्रदेशमा विशेषज्ञ उपचार पाउनेछन्। यसले काठमाडौं केन्द्रित उपचारको चाप घटाउनेछ। दीर्घकालीन रूपमा स्वास्थ्य प्रणाली थप सुदृढ हुने निष्कर्ष प्रतिवेदनले निकालेको छ।
