काठमाडौं । देशका विभिन्न स्थानमा आज दिउँसो भारी र राति धेरै भारी वर्षा हुने सम्भावना रहेको जल तथा मौसम विज्ञान विभागले जनाएको छ । मनसुनी न्यूनचापीय रेखा औसत स्थानको आसपासमा रहँदा यस्तो मौसमी अवस्थाको सिर्जना भएको हो ।
विभागका अनुसार राति कोसी, वाग्मती र गण्डकी प्रदेशका हिमाली तथा पहाडी भूभागका एक वा दुई स्थानमा धेरै भारी वर्षाको सम्भावना छ । कर्णाली प्रदेशको पहाडी क्षेत्र, लुम्बिनी र सुदूरपश्चिम प्रदेशको पहाडी र तराई भेगका केही स्थानमा भारी र एक वा दुई स्थानमा धेरै भारी वर्षाको पूर्वानुमान छ ।
दिउँसो भने देशभर सामान्य बदली रहनेछ । हिमाली भूभागका केही स्थानमा मेघगर्जन र चट्याङसहित मध्यम वर्षा वा हिमपातको सम्भावना छ । पहाडी भेगका धेरै स्थानमा मध्यम वर्षाको अपेक्षा गरिएको छ । काठमाडौं उपत्यकामा बिहानैदेखि वर्षा भइरहेको छ ।
कोसी, लुम्बिनी र सुदूरपश्चिम प्रदेशका तराई भेगका केही स्थानमा, साथै मधेस, वाग्मती र गण्डकी प्रदेशका तराई भेगका थोरै स्थानमा मेघगर्जन र चट्याङसहित मध्यम वर्षाको सम्भावना छ ।
रातिको समयमा देशभर सामान्य बदली रहनेछ । हिमाली भूभागका केही स्थानमा मेघगर्जन र चट्याङसहित मध्यम वर्षा वा हिमपातको सम्भावना छ । पहाडी भूभागका साथै वाग्मती, गण्डकी, लुम्बिनी र सुदूरपश्चिम प्रदेशका तराई भेगका धेरै स्थानमा मेघगर्जन र चट्याङसहित मध्यम वर्षाको सम्भावना छ । मधेस र कोसी प्रदेशका तराई भेगका थोरै स्थानमा मध्यम वर्षाको अनुमान गरिएको छ ।
