भारतले नेपाली चियाको गुणस्तर परीक्षणका नाममा डेढ महिनादेखि निकासी रोकिदिएपछि उत्पादित चियाले बजार नपाएर कुहिने अवस्था आएको छ। यसले इलाम र झापाका चिया उद्योग बन्दको घोषणा गरिएको छ।
नेपाल चिया उत्पादक संघका अध्यक्ष आदित्य पराजुलीका अनुसार सोमबारदेखि इलामका ५६ वटा चिया उद्योग बन्द हुनेछन्। बुधबारदेखि झापाका ३० वटा उद्योग बन्द गरिनेछन्। यी उद्योग बन्द हुँदा एक लाख मजदुर र किसानका ३० हजार घरपरिवार प्रत्यक्ष प्रभावित हुनेछन्।
इलाममा वार्षिक ६५ लाख किलो चिया उत्पादन हुन्छ। भारतीय पक्षको अवरोधले ठूलो मात्रामा चिया मौज्दात छ। बजार नपाउँदा उद्योग सञ्चालन गर्न नसकिने अवस्था आएको उद्योगीहरूको गुनासो छ।
