विपक्षी दलको अवरोधपछि सोमबार स्थगित भएको प्रतिनिधिसभाको बैठक विशेष कारण देखाउँदै मंगलबार दिउँसो १ बजेसम्मका लागि सारिएको छ।
सोमबारको बैठक सुरु हुनेबित्तिकै विपक्षी सांसदहरूले आ-आफ्नो स्थानबाट उठेर विरोध जनाएका थिए। एमालेका संसदीय दलका उपनेता पद्मा अर्यालले प्रधानमन्त्रीले कूटनीतिक मर्यादा र पदीय जिम्मेवारी उल्लंघन गर्दै अभिव्यक्ति दिएको भन्दै सदनमा आएर माफी माग्नुपर्ने माग गरेकी थिइन्।
अन्य विपक्षी दलहरूले पनि प्रधानमन्त्रीले सदनमा जवाफ दिनुपर्ने अडान राखेका थिए। विपक्षीहरूको निरन्तरको विरोधपछि सभामुख डोलप्रसाद अर्यालले बैठक १५ मिनेटका लागि स्थगित गरेका थिए।
संघीय संसद्का महासचिव पद्मप्रसाद पाण्डेयले सूचना प्रकाशित गर्दै बैठक मंगलबार (जेठ २६) का लागि सारिएको जानकारी दिएका छन्।
