रौतहटको गरुडा–समनपुर सडकखण्डमा अज्ञात सवारी साधनले ठक्कर दिँदा एक साइकल यात्रीको घटनास्थलमै मृत्यु भएको छ। मृतकको पहिचान खुल्न बाँकी रहेको प्रहरीले जनाएको छ।
इलाका प्रहरी कार्यालय गरुडाका प्रमुख डीएसपी शङ्कर प्रसाद आचार्यका अनुसार नम्बर प्लेट नखुलेको सवारी साधनले साइकल यात्रीलाई ठक्कर दिएको हो। सोमबार बिहान स्थानीयवासीले सडक किनारमा शव देखेपछि प्रहरीलाई खबर गरेका थिए।
प्रहरीले मृतक अन्दाजी ४० देखि ४५ वर्षका पुरुष हुन सक्ने अनुमान गरेको छ। शव सडक छेउमा साइकलको भागमा खुट्टा अड्किएको अवस्थामा फेला परेको थियो। प्रहरीले घटनास्थलबाट आवश्यक प्रमाण सङ्कलन गरिसकेको छ।
डीएसपी आचार्यले दुर्घटना वा अन्य कारण दुवै कोणबाट अनुसन्धान भइरहेको बताए। प्रहरीले आज बेलुकीसम्म घटनाको कारण पत्ता लगाएर सार्वजनिक गर्ने जनाएको छ। शव पोस्टमार्टमका लागि प्रादेशिक अस्पताल गौर पठाइने तयारी छ।
