कञ्चनपुरमा चार वर्षको अवधिमा सवारी दुर्घटनामा परी १५४ जनाले ज्यान गुमाएका छन्। यस अवधिमा एक हजार ७८४ जना घाइते भएका छन्। जिल्ला ट्राफिक कार्यालयको तथ्याङ्कअनुसार आर्थिक वर्ष २०७९/८० देखि हालसम्म यो आँकडा पुगेको हो।
जिल्ला ट्राफिक प्रहरी कार्यालयका प्रमुख प्रहरी निरीक्षक बलेन्द्र नाथले पूर्व-पश्चिम राजमार्गमा दुर्घटनाको जोखिम बढी रहेको बताए। उनले सवारी चलाउँदा सचेत रहन आग्रह गरे। मोटरसाइकल र स्कुटर दुर्घटनामा बढीले ज्यान गुमाएको तथ्याङ्क छ। साना सवारीसाधनको दुर्घटना ठूला सवारीको तुलनामा बढी हुने गरेको नाथले बताए।
प्रहरी निरीक्षक नाथका अनुसार सडक जाँच कडा पारिएपछि मादक पदार्थ सेवन गरी सवारी चलाउनेको सङ्ख्यामा कमी आएको छ। राति १२ बजेसम्म नियमित जाँच हुने गरेको छ। बजार क्षेत्र तथा राजमार्गका विभिन्न स्थानमा चेकप्वाइन्ट रहने गरेको छ। अधिकांश दुर्घटना तीव्र गतिकै कारण हुने गरेको छ।
आर्थिक वर्ष २०७९/८० मा ४३ जनाको मृत्यु र ५९ जना घाइते भएका थिए। आव २०८०/८१ मा ३२ जनाको मृत्यु र ७४ जना घाइते भए। आव २०८१/८२ मा ३८ जनाको मृत्यु र ७७३ जना घाइते भएका थिए।
गत आव २०८२/८३ मा ५६४ वटा सवारी दुर्घटना भएका थिए। यसमा ४१ जनाको मृत्यु र ८७८ जना घाइते भएको प्रहरी निरीक्षक नाथले जनाए। विगत तीन आवमा ट्राफिक नियम उल्लङ्घन गर्ने ३५ हजार ८६१ सवारी साधनलाई कारबाही गरिएको छ। गत आवमा मात्रै ट्राफिक कारबाहीबाट रु ५९ लाख १४ हजार ५०० राजस्व सङ्कलन भएको थियो।
