राष्ट्रिय स्वतन्त्र पार्टी (रास्वपा) का सभापति रवि लामिछानेले आज बिहान ९ बजे समसामयिक राजनीतिक विषयमा छलफल गर्न सर्वदलीय बैठक बोलाएका छन्। बैठकमा नेपाली कांग्रेसका सभापति गगनकुमार थापा भने सहभागी नहुने भएका छन्।
थापाको अनुपस्थितिको कारण खुलाइएको छैन। कांग्रेसका तर्फबाट भने संसदीय दलका नेता भीष्मराज आङ्दम्बे र सांसद फिर्दोश आलम सहभागी हुनेछन्।
बैठक सिंहदरबारस्थित सङ्घीय संसद् सचिवालयअन्तर्गत सार्वजनिक लेखासमितिको हलमा बस्दैछ। प्रतिनिधिसभा र राष्ट्रियसभामा प्रतिनिधित्व गर्ने राजनीतिक दलका अध्यक्ष÷सभापतिसहित दुई÷दुई जनालाई बैठकमा आमन्त्रण गरिएको छ।
यस्तै, नेकपा (एकीकृत समाजवादी) का तर्फबाट सहसंयोजक माधवकुमार नेपाल र नेता वर्षमान पुन सहभागी हुनेछन्। नेकपाका संयोजक पुष्पकमल दाहाल अस्वस्थ भएकाले बैठकमा नजाने भएका हुन्। प्रमुख सचेतक युवराज दुलालका अनुसार दाहाल केही दिन आराम गर्नेछन्।
प्रधानमन्त्री बालेन्द्र शाहले नेपालले भारतको जग्गा मिचेको अभिव्यक्ति दिएपछि विपक्षी दलहरूले प्रतिनिधिसभा र राष्ट्रियसभा दुवै सदन अवरुद्ध गरिरहेका छन्। विपक्षी सांसदहरूले प्रधानमन्त्री शाहले संसद्मा माफी माग्नुपर्ने र उनको अभिव्यक्ति संसद्को रेकर्डबाट हटाउनुपर्ने माग राखेका छन्।
