एमालेको कमान्ड बादलको हातमा: ओली पक्राउपछि कार्यवाहक अध्यक्ष र दलको नेता चयन, सुहाङलाई रोकियो
काठमाडौं । जेनजी आन्दोलनपछिको बदलिँदो राजनीतिक परिस्थिति र पार्टी अध्यक्ष केपी शर्मा ओलीको गिरफ्तारीसँगै नेकपा एमालेको नेतृत्व पूर्वमाओवादी नेता रामबहादुर थापा ‘बादल’ को काँधमा आइपुगेको छ। तत्कालीन नेकपा विभाजनपछि एमाले रोजेका बादल ५ वर्षमै पार्टीको कार्यवाहक अध्यक्ष र संसदीय दलको नेता बन्न सफल भएका छन्।
कार्की आयोगको सिफारिस कार्यान्वयन गर्ने क्रममा गत शनिबार (चैत १४) पूर्वप्रधानमन्त्री ओली पक्राउ परेपछि बादलले सोही दिन कार्यवाहक अध्यक्षको जिम्मेवारी पाएका थिए। लगत्तै चैत १७ गते बसेको संसदीय दलको बैठकले उनलाई निर्विरोध दलको नेता चयन गरेको छ।
युवा नेता सुहाङ नेम्वाङलाई रोकियो
संसदीय दलको नेतामा ३६ वर्षीय युवा सांसद सुहाङ नेम्वाङले पनि दाबी गरेका थिए। तर, उनलाई पार्टी संस्थापन पक्षले उम्मेदवारी दिनबाटै वञ्चित गरेको छ। स्रोतका अनुसार, सुहाङलाई राजेन्द्र राई र अर्जुन कार्कीले प्रस्तावक र समर्थक बस्ने वचन दिएका थिए। तर, फारम बुझाउने बेलामा महासचिव शंकर पोखरेल र उपाध्यक्ष विष्णुप्रसाद पौडेलको दबाबमा राई र कार्कीलाई पछि हट्न बाध्य पारियो।
युवा नेतालाई दबाबमा पारेर उम्मेदवारी नै दर्ता गर्न नदिएको भन्दै उपमहासचिव योगेश भट्टराईले सार्वजनिक रूपमै आपत्ति जनाएका छन् भने पार्टीका स्थानीय कार्यकर्ता र युवा पुस्तामा आक्रोश देखिएको छ।
समानुपातिकबाट सुरक्षित अवतरण
गत फागुन २१ गतेको निर्वाचनमा एमालेले ऐतिहासिक पराजय भोग्दै अध्यक्ष ओलीसहित ११ जना पदाधिकारीले प्रत्यक्षतर्फ चुनाव हारेका थिए। तर, बादल भने चुनावअघि नै सुरक्षित बाटो रोज्दै समानुपातिकतर्फ बसेका थिए। पुस १३ को सचिवालय बैठकमा आफूलाई आदिवासी जनजाति पुरुषतर्फ एक नम्बरमा नराखेको भन्दै उनले चर्को विरोध गरेपछि ओलीले भोलिपल्ट सूची सच्याएका थिए। त्यही निर्णयले आज उनलाई पार्टीको सर्वोच्च कुर्सीमा पुर्याएको हो।
जनयुद्धका कमान्डरदेखि एमालेको नेतृत्वसम्म
१० वर्ष लामो माओवादी सशस्त्र विद्रोहका प्रमुख सैन्य कमान्डर रहेका बादलको यो राजनीतिक यात्रा निकै रोचक छ। २०७७ फागुन ७ गते तत्कालीन प्रधानमन्त्री ओलीले संसद् विघटन गर्दा माओवादी धार छाडेर ओलीलाई साथ दिएका बादलले त्यसको प्रतिफलस्वरूप आज सिंगो एमालेको पार्टी र संसदीय मोर्चाको नेतृत्व गर्ने अवसर पाएका छन्।
