१ लाखको ऋण साढे ६ लाख पुग्यो: गृह मन्त्रालयकै निर्देशन लत्याउँदै मिटरब्याज पीडित हिरासतमै
सिरहा । एकातिर सरकारले मिटरब्याज (अनुचित लेनदेन) लाई अपराध घोषणा गर्दै कानुन बनाएको छ, अर्कोतिर तिनै साहुहरूको फन्दामा परेका वास्तविक पीडितहरू भने न्याय पाउनुको साटो उल्टै जेल चलान भइरहेका छन्। सिरहाको कर्जन्हा नगरपालिका–८, थल्हा गौतारीकी ३५ वर्षीया पानवती देवी दनुवार यसैको पछिल्लो उदाहरण बनेकी छिन्।
कान्तिपुर दैनिकमा विनय आजादले लेखेको रिपोर्टअनुसार, १ लाख रुपैयाँ ऋण लिएकी पानवतीलाई साहुले किर्ते तमसुक बनाएर फसाएपछि उनी गत मंगलबारदेखि जिल्ला प्रहरी कार्यालय सिरहाको हिरासतमा छिन्। उनका श्रीमान् ४० वर्षीय मनोज कुँवर दिनभर प्रहरी कार्यालयको परिसरमा आँसु झार्दै पत्नी छुट्ने आसमा बस्ने गरेका छन्।
यसरी फसाइयो किर्ते तमसुकमा
कुँवर दम्पतीले तीन वर्षअघि (२०७९ पुसमा) बिरामी बुवाको उपचारका लागि मिर्चैयाका मिटरब्याजी वीरेन्द्र साहसँग १ लाख रुपैयाँ ऋण लिएका थिए। तर, साहुले वीरेन्द्रकी पत्नी इन्दु साहको नाममा मूलधन नै ३ लाख रुपैयाँ राखेर कपाली तमसुक बनाए।
२०७५ साउन २० गतेपछि वडा कार्यालयमा कपाली दर्ता गर्नुपर्ने कानुनी व्यवस्था छ। यही नियम छल्न साहुले चलाखी गर्दै २०७९ सालमा लिएको ऋणको कागजलाई २०७५ साउन १३ गतेको मिति राखेर (ब्याकडेटमा) किर्ते तमसुक बनाएको मनोजले बताएका छन्। सोही किर्ते कागजको आधारमा अदालतले साहुलाई सवा ६ लाख रुपैयाँ तिर्नुपर्ने फैसला सुनाएपछि पानवती पक्राउ परेकी हुन्।
गृह मन्त्रालयको निर्देशनको धज्जी
गत कात्तिक २३ गते गृह मन्त्रालयले देशभरका जिल्ला प्रशासन कार्यालयलाई परिपत्र गर्दै “पीडकले पीडितमाथि नै मुद्दा हालेर पक्राउ पुर्जी जारी भएको भए पनि त्यस्ता पीडितलाई नपक्रन र छलफलमा ल्याउन” स्पष्ट निर्देशन दिएको थियो। तर, कानुन र गृहकै निर्देशनविपरीत प्रहरीले उल्टै मिटरब्याज पीडितलाई धरपकड गरिरहेको छ।
जिल्ला प्रहरी कार्यालय सिरहाका प्रवक्ता डीएसपी रमेशबहादुर पालले अदालतको फैसला कार्यान्वयनका लागि पानवतीलाई पक्राउ गरिएको र अब अदालतमा पेस गरेर कारागार (जेल) पठाउने तयारी भइरहेको जानकारी दिएका छन्। गरिबको पक्षमा बनेको भनिएको कानुन व्यवहारमा लागू नहुँदा साहुमहाजनको ज्यादती झनै बढेको यो घटनाले प्रस्ट पारेको छ।
