प्रमुख विपक्षी दलहरूले सरकारको कार्यशैलीप्रति असन्तुष्टि जनाउँदै संसद्मा थप सशक्त रूपमा प्रस्तुत हुने तयारी गरेका छन्। आइतबार बसेको विपक्षी दलका प्रमुख सचेतकहरूको छलफलले आगामी जेठ १२ गतेको प्रतिनिधि सभा बैठकमा सरकारको कडा प्रतिरोध गर्ने निष्कर्ष निकालेको हो।
सिंहदरबारस्थित एमाले संसदीय दलको कार्यालयमा नेपाली कांग्रेस, नेकपा (एमाले), नेकपा र राष्ट्रिय प्रजातन्त्र पार्टी (राप्रपा) का प्रमुख सचेतकहरूको उपस्थितिमा भएको छलफलले सरकारविरुद्ध एकीकृत रणनीति बनाउने सहमति गरेको छ।
एमाले प्रमुख सचेतक ऐनबहादुर महरले सरकारले संसदीय मूल्य–मान्यता विपरीत विपक्षीको आवाज दबाउने र पेलेर अघि बढ्ने प्रयास गरेको आरोप लगाए। उनले यस प्रकारको प्रवृत्तिविरुद्ध विपक्षी दलहरू एक ढिक्का भएर उभिनुपर्ने अवस्था आएको बताए।
महरका अनुसार सरकारले सडकदेखि सदनसम्म र गरिबका झुपडीसम्म पेलेरै जाने नीति लिएको छ, जसले गर्दा सरकारलाई जिम्मेवार बनाउन विपक्षी दलहरू एक ठाउँमा आउनु आवश्यक भएको छ।
छलफलमा सरकारको गैरलोकतान्त्रिक चरित्र, विपक्षीको आवाजलाई बेवास्ता गर्ने प्रवृत्ति र सभामुखको भूमिकाबारे पनि गम्भीर चिन्ता व्यक्त गरिएको थियो।
संविधानको कार्यान्वयन, प्रतिनिधि सभा नियमावलीको पालना र लोकतन्त्रको संरक्षणका लागि विपक्षी दलबीचको सहकार्यलाई आगामी दिनमा पनि निरन्तरता दिने सहमति भएको महरले जानकारी दिए। विपक्षी दलहरूले प्रधानमन्त्री संसद्मा उपस्थित भई सांसदहरूले उठाएका प्रश्नको जवाफ दिनुपर्ने माग गर्दै निरन्तर दबाब दिँदै आएका छन्।
