सांसदलाई कारबाही सिफारिसबिनै छानबिन समितिको प्रतिवेदन सभामुख अर्याललाई बुझाइयो
सभामुख डोलप्रसाद अर्यालले गठन गरेको छानबिन समितिले सांसदहरूलाई कारबाहीको सिफारिस नगरी प्रतिवेदन बुझाएको छ। जेठ १७ गते प्रतिनिधि सभा नियमावली पारित गर्ने क्रममा सत्ता र प्रतिपक्षी सांसदहरूबीच बैठकमा भनाभन र धकेलाधकेल भएको थियो।
जेठ १८ गते गठित समितिले माइक र कुर्सी लगायतका भौतिक सामग्रीमा सामान्य क्षति भएको विवरणसहितको प्रतिवेदन बुझाएको हो। प्रतिनिधि सभाका सचिव प्रकाश अधिकारीको संयोजकत्वमा गठित समितिले सांसदहरूमाथि भने कुनै कारबाहीको सिफारिस नगरेको स्रोतले जनाएको छ।
प्रतिवेदनमाथि सभामुख अर्यालको निर्णय पर्खंदै
छानबिन समितिको प्रतिवेदन सभामुख डोलप्रसाद अर्याललाई बुझाइएको छ। सभामुख अर्यालले प्रतिवेदनको अध्ययन गरी कारबाहीबारे निर्णय लिनेछन्। समितिको प्रतिवेदनमा भौतिक क्षतिको विवरण मात्र उल्लेख छ। सांसदहरूमाथि कारबाहीका लागि कुनै सिफारिस गरिएको छैन।
