नेपालमा यस वर्षको प्रि–मनसुन अवधिमा विगत ४५ वर्षयताकै सर्वाधिक वर्षा रेकर्ड भएको छ। जल तथा मौसम विज्ञान विभागका अनुसार देशभर औसत ३३९.७७ मिलिमिटर वर्षा मापन गरिएको छ। यो औसत २२६.३ मिलिमिटरको १४५.५ प्रतिशत हो।
मौसमविद् सञ्जिव अधिकारीले पश्चिमी न्यूनचापीय प्रणाली, स्थानीय वायुको सक्रियता र अत्यधिक गर्मीका कारण यो वर्षा भएको बताए।
विभागको तथ्यांकअनुसार सन् २०२६ मा भएको ३३९.७७ मिलिमिटर वर्षा प्रि–मनसुन अवधिको सर्वाधिक हो। यसअघि सन् १९९० मा ३३१.४० मिलिमिटर वर्षा भएको थियो।
सन् २००० मा ३२३.१९ मिलिमिटर, सन् २०२१ मा ३१७.८८ मिलिमिटर र सन् २०२० मा ३१५.७८ मिलिमिटर वर्षा भएको थियो। यस वर्षको वर्षाले यी सबै रेकर्ड उछिनेको छ।
विभागका अनुसार प्रि–मनसुनमा औसतभन्दा बढी वर्षा जलवायु प्रणालीमा आएको परिवर्तनको संकेत हो। यस अवधिमा चट्याङ, हावाहुरी, असिना र भारी वर्षाका घटना बढेका छन्।
यो वर्षा सन् १९९० यताकै मात्र नभई उपलब्ध अभिलेखमा सबैभन्दा उच्च रेकर्ड हो।
