निरन्तरको वर्षा र पहिरोले देशभरका मुख्य राजमार्ग अवरुद्ध पारेको छ। मंगलबार राति साढे ८ बजेको प्रहरी अपडेट अनुसार ११ सडक खण्ड पूर्ण रूपमा बन्द छन्।
सम्भावित जोखिमले मुख्य राजमार्गमा रात्रिकालीन यात्रामा रोक लगाइएको छ। बाढीपहिरोको उच्च जोखिममा बागमती प्रदेशका दुई मार्ग छन्।
वि.पि. राजमार्गको खुर्कोट–नेपालथोक–कटुन्जेबेँसी सडक खण्डमा बेलुका ६:०० देखि बिहान ४:०० बजेसम्म सवारी रोकिन्छ। यो सडकमा बिहान ४:०० देखि बेलुका ६:०० बजेसम्म मात्र गाडी चल्छन्।
कान्ति लोकपथको हेटौँडा–ठिङ्गन–बागमती–ललितपुर खण्डमा बेलुका ५:०० देखि बिहान ५:०० बजेसम्म सवारी रोक्न निर्देशन छ।
मंगलबार थप दुई जिल्लाका सडक ठप्प भए। पाँचथरको राँके–रवि–भेडेटार सडक र गोरखाको आरुघाट–माछीखोला सडक पहिरोले अवरुद्ध छन्।
अरनिको राजमार्गका दुई खण्ड अझै खुलेका छैनन्। सिन्धुपाल्चोकको जिरोकिलो र ईकु पहिरोले राजमार्ग ठप्प छ।
बागलुङको कालीगण्डकी करिडोर र जाजरकोटको भेरी करिडोर (जाजरकोट–डोल्पा सडक) पनि पहिरोले अवरुद्ध छन्।
कोशी प्रदेशको मध्य पहाडी लोकमार्ग खोटाङको माम्खामा पूर्ण रूपमा अवरुद्ध छ।
इलामको मेची राजमार्ग राजदुवालीमा हिलोले ठप्प छ। वैकल्पिक बाटो भने सुचारु छ। भोजपुरको मध्य पहाडी लोकमार्ग र रसुवाको पासाङ ल्हामु सडक खण्ड एकतर्फी सुचारु छन्।
