झापा–२ की प्रतिनिधिसभा सदस्य इन्दिरा रानामगरले निर्वाचन क्षेत्रका नागरिकसँग प्रत्यक्ष संवादमा जोड दिएकी छन्। गाउँको चौतारोदेखि अस्पताल र सरकारी कार्यालयसम्म पुगेर उनले स्थानीयका समस्या सुन्ने, सेवा प्रवाहको अवस्था बुझ्ने र समाधानका लागि पहल गरिरहेकी छन्।
निर्वाचन जितेपछि अधिकांश जनप्रतिनिधि राजधानीको राजनीतिक व्यस्ततामा सीमित हुने आम बुझाइ विपरीत रानामगरले फरक अभ्यास गरिरहेकी छन्। पूर्वउपसभामुखसमेत रहेकी उनले गाउँबस्तीमा आयोजित भेटघाट तथा अन्तर्क्रियामा स्थानीयवासीका सडक, कृषि, स्वास्थ्य, शिक्षा, खानेपानी, वन्यजन्तु जस्ता दैनिक जीवनसँग जोडिएका समस्याहरूलाई गम्भीरतापूर्वक लिएकी छन्।
सांसद रानामगरले नागरिकका सुझाव, गुनासा र अपेक्षालाई टिपोट गरी सम्बन्धित निकायसँग समन्वय गरी समाधानका लागि पहल गर्ने प्रतिबद्धता व्यक्त गरेकी छन्। उनका अनुसार यस्ता प्रत्यक्ष संवादले स्थानीय आवश्यकता र विकास निर्माणका चुनौती पहिचान गर्न सहयोग पुग्नेछ।
बुद्धशान्ति गाउँपालिकाका विभिन्न वडामा स्थानीयसँग भेटघाट गरेकी रानामगरले बुद्धशान्ति भागिरथा अस्पतालको निरीक्षण गरी सेवा प्रवाहका विषयमा छलफल गरिन्। उनले हेलोचोकदेखि दक्षिणको सडक, भोटेटार चोक, गलानगाउँको अधुरो सडक तथा हात्तीकिल्ले पैनी (बिन्धुलीबाँध) क्षेत्रमा पुगेर पूर्वाधारको अवलोकन गरी स्थानीयसँग छलफल गरेकी थिइन्।
भेटघाटका क्रममा स्थानीयले कृषि, पूर्वाधार र शान्ति सुरक्षाका विषयमा धेरै समस्या राखेको रानामगरले बताइन्। उनले बिर्तामोडको कृषि थोकबजार व्यवस्थापन, हात्तीको आतङ्क, पूर्वाधार विकास तथा समयमै मल–बीउ नपाएको गुनासो आएको बताउँदै ती समस्या समाधानका लागि आफूहरू क्रियाशील रहेको उल्लेख गरिन्।
जनप्रतिनिधिको भूमिका संसद्मा नीति निर्माणमा मात्र सीमित नरही नागरिकका दैनिक समस्या बुझ्ने र समाधानका लागि सम्बन्धित निकायसँग समन्वय गर्ने पनि भएको रानामगरको भनाइ छ। यस्ता प्रत्यक्ष भेटघाट र अन्तर्क्रियालाई आगामी दिनमा पनि निरन्तरता दिइने उनले बताइन्।
यसैबीच, अर्जुनधारा नगरपालिकामा आयोजित एक कार्यक्रममा सांसद रानामगरले वर्षौँदेखि ओत लाग्ने जमिनको कानुनी अधिकार नपाएर उठिबासको त्रासमा रहेका भूमिहीन, सुकुमवासी तथा अव्यवस्थित बसोबासीलाई लालपुर्जा वितरण गरिन्। प्रमुख अतिथिका रूपमा बोल्दै उनले नागरिकको सुरक्षित, सम्मानित र आत्मनिर्भर जीवनका लागि भूमिको अधिकार अनिवार्य रहेको बताइन्।
नागरिकसँगको प्रत्यक्ष संवादमार्फत विकास निर्माणमा देखिएका सुस्तता र स्थानीय आवश्यकता पहिचान गरी सम्बन्धित निकायसँग समन्वय र सहकार्य गर्ने उद्देश्यका साथ यस्ता कार्यक्रमलाई निरन्तरता दिइने उनको भनाइ छ।
झापामा रास्वपाबाट निर्वाचित अन्य सांसदहरू पनि यस अभियानमा सक्रिय छन्। झापा क्षेत्र नं. १ की सांसद निशा डाँगी, क्षेत्र नं. ३ का सांसद प्रकाश पाठक र क्षेत्र नं. ४ का सांसद शम्भु सुस्केरा पनि स्थानीयका समस्या बुझ्न गाउँमै छन्। झापा क्षेत्र नं. ५ बाट निर्वाचित प्रतिनिधिसभा सदस्य वालेन्द्र शाह हाल प्रधानमन्त्रीको जिम्मेवारीमा छन्।
