पर्सा प्रशासनले खाना पकाउने ग्यासमा कृत्रिम अभाव सिर्जना गर्ने व्यवसायीलाई प्रचलित कानुनबमोजिम कारबाही गरिने चेतावनी दिएको छ। बजारमा ग्यासको सहज आपूर्तिका लागि प्रशासनले यो कदम चालेको हो।
सहायक प्रमुख जिल्ला अधिकारी कृष्ण थापाले ग्यासको कृत्रिम अभाव सिर्जना गर्नेलाई ‘कालोबजार तथा केही अन्य सामाजिक अपराध तथा सजाय ऐन, २०३२’ र ‘उपभोक्ता संरक्षण ऐन, २०७५’ बमोजिम कारबाही हुने बताए। यसमा मालसामान जफत, भारी जरिवाना र जेल सजायसम्मको प्रावधान रहेको उनले स्पष्ट पारे।
प्रशासनले बजार अनुगमनलाई तीव्र बनाएको छ। ग्यासको अभाव हुन नदिन व्यवसायीहरूलाई निर्देशन दिइएको छ। कृत्रिम अभाव सिर्जना गरी कालोबजारी गर्ने जो कोहीलाई पनि कानुनी दायरामा ल्याइने थापाले बताए।
