थाइल्यान्डको बैंकक नजिकैको एक विद्यालयमा १४ वर्षीय विद्यार्थीले गोली चलाउँदा कम्तीमा ७ जनाको मृत्यु भएको छ। ३० भन्दा बढी घाइते भएका छन्। कक्षा ९ मा अध्ययनरत ती विद्यार्थीले विद्यालय परिसरमा २६ राउन्ड गोली चलाएको प्रहरीले जनाएको छ।
घटना बिहान करिब १० बजेतिर भएको थियो। पोह टेक तुङ फाउन्डेसनका स्वयंसेवकले गोली चलेको सुनेपछि प्रहरीलाई खबर गरेका थिए। प्रत्यक्षदर्शीका अनुसार ती किशोर एक कोठाबाट अर्को कोठामा जाँदै शिक्षकलाई गोली हानेका थिए।
प्रहरीका अनुसार गोली चलाएको आशंका गरिएका १४ वर्षीय विद्यार्थी मृत फेला परेका छन्। प्रहरीले घटनास्थलबाट थप ३४ राउन्ड गोली बरामद गरेको छ।
स्वास्थ्यमन्त्री पट्टाना प्रोम्फातका अनुसार घटनामा ५ जना शिक्षकको मृत्यु भएको छ। गोली प्रहार गर्ने विद्यार्थीले राजधानी बैंककको बाहिरी क्षेत्रमा रहेको आफ्नो घरमा हजुरबुबा–हजुरआमालाई गोली हानेपछि विद्यालय गएको बताइएको छ। हजुरबुबा–हजुरआमा घरमै मृत भेटिएका थिए। प्रहरीका अनुसार किशोरले प्रयोग गरेको ९ एमएम पिस्तोल उनका हजुरबुबाको थियो, जो शिक्षक थिए।
थाइल्यान्डका उपगृहमन्त्री पोलापी सुवान्चावीले आरोपित विद्यार्थी भिडियो गेम खेल्न रुचाउने गरेको विवरण सार्वजनिक गरेका छन्। विद्यालयका एक शिक्षकले ती किशोर ‘राम्रो पढाइ र राम्रो व्यवहार भएको विद्यार्थी’ भएको र आक्रामक स्वभावको बारेमा कुनै जानकारी नभएको बताएका छन्।
यस गोलीकाण्डपछि थाइल्यान्डका प्रतिपक्षी नेता नथाफोङ रुएङपन्याउतले थाई अधिकारीहरूलाई देशको बन्दुक नियन्त्रण उपायहरूको पुनरावलोकन गर्न आह्वान गरेका छन्। उनले शैक्षिक संस्थामा भएको हिंसात्मक घटनाले बन्दुक नियन्त्रणको गम्भीर र व्यवस्थित पुनरावलोकनको आवश्यकतालाई जोड दिएको बताएका छन्।
यसअघि पनि थाइल्यान्डमा यस्ता घटना भएका छन्। यस वर्षको फेब्रुअरीमा सोफ्ला प्रान्तको हाट याई जिल्लास्थित विद्यालयमा १७ वर्षीय बन्दुकधारीले आक्रमण गर्दा एक निर्देशिकाको मृत्यु भएको थियो। अक्टोबर २०२२ मा नोङ बुआ लाम्फु प्रान्तको बाल विकास केन्द्रमा पूर्वप्रहरीले गरेको आक्रमणमा २२ बालबालिकासहित ३७ जनाको मृत्यु भएको थियो।
