नेकपा एमालेकी लुम्बिनी प्रदेशसभा सदस्य रेखाकुमारी शर्मालाई बालश्रम र अमानवीय शोषणको गम्भीर आरोपमा प्रहरीले पक्राउ गरेको छ। काठमाडौं उपत्यका अपराध अनुसन्धान कार्यालयको विशेष टोलीले उनलाई आइतबार मध्यराति काठमाडौंको धुम्बाराहीबाट नियन्त्रणमा लिएको हो।
कानुन निर्माण गर्ने ओहोदामा रहेकी सांसद शर्मामाथि एक नाबालिकालाई विगत ६ वर्षदेखि आफ्नो घरमा राखेर श्रम शोषण गरेको र शारीरिक तथा मानसिक यातना दिएको प्रमाणित उजुरी छ। लामो समयदेखि शक्तिको आडमा बच्दै आएकी शर्मा अन्ततः प्रहरीको फन्दामा परेकी हुन्।
६ वर्षसम्म बन्धक र पाइपले कुटपिट काठमाडौं महानगरपालिकाका प्रशिक्षार्थी विद्यार्थीले सामुदायिक विद्यालयमा अध्ययनरत बालबालिकाको अवस्थाबारे गरेको सर्वेक्षणका क्रममा यो दर्दनाक रहस्य बाहिरिएको थियो। ती नाबालिकाले आफूलाई घरधनी (सांसद शर्माको परिवार) ले हात र पाइपले कुटपिट गर्ने गरेको खुलासा गरेकी थिइन्।
उनलाई घरमा पोछा लगाउने, खाना बनाउने, बिरुवामा पानी हाल्ने लगायतका सम्पूर्ण घरायसी काम गर्न बाध्य पारिएको थियो। यति मात्र होइन, ६ वर्षसम्म ती बालिकालाई आफ्नो परिवारसँग भेट्न दिइएको थिएन र दशैं जस्तो चाडमा समेत घर जान वञ्चित गरिएको थियो। महानगरको इजलासले गोप्य कुराकानी गर्दा यातनाको पुष्टि भएपछि शर्माविरुद्ध प्रहरीमा उजुरी दिइएको थियो।
मुद्दा नचलाउने प्रपञ्च र बालेनको त्यो ‘भविष्यवाणी’ बालिकाको दयनीय अवस्था देखेपछि २०८१ जेठ १४ गते काठमाडौं महानगरपालिकाको टोली, नगरप्रहरी र नेपाल प्रहरीसहितको उपस्थितिमा मुचुल्का उठाएर उनको उद्धार गरिएको थियो। तर, राजनीतिक पहुँचका कारण २०८१ माघ अन्तिम साता जिल्ला र उच्च सरकारी वकिलको कार्यालय हुँदै महान्यायाधिवक्ताको कार्यालयले सांसद शर्माविरुद्ध ‘मुद्दा नचलाउने’ रायसहितको फाइल अघि बढाएको थियो।
राज्यसत्ताले नै पीडकलाई उन्मुक्ति दिन खोजेपछि तत्कालीन काठमाडौं महानगरपालिकाका मेयर (तथा हालका प्रधानमन्त्री) बालेन शाहले सामाजिक सञ्जालमार्फत गम्भीर असन्तुष्टि पोखेका थिए। उनले लेखेका थिए, “सरी नानु, तिम्रा पीडकका विरुद्धमा मुद्दा नचल्ने बनाएछ सरकारले। नआत्तिनु, समय आउनेछ। यस्तै विभेद, अपराध मास्न अनि ती कुकर्म गर्नेहरूलाई तह लगाउन तिमी र तिमी जस्तै धेरै नानीबाबुले पढ्न पर्छ।”
नभन्दै, आइतबार राति प्रहरीले उनै सांसद शर्मालाई हतकडी लगाएको छ। बालेनले त्यतिबेला भनेको ‘समय आउँछ’ भन्ने भनाइ आज सत्य साबित भएको छ।
सार्वजनिक प्रभाव: न्याय मरेको छैन गाउँटोल र मधेस-पहाडका गरिब तथा निमुखा परिवारका बालबालिकालाई पढाउने बहानामा सहर ल्याएर दास बनाउने प्रवृत्ति अझै पनि जीवितै छ। तर, समाजको अगुवा र प्रदेशसभा सदस्य जस्तो गरिमामय पदमा बसेका व्यक्ति नै यस्तो जघन्य अपराधमा संलग्न हुनुले राजनीतिक नैतिकतामाथि ठूलो प्रश्नचिह्न खडा गरेको थियो। शर्माको पक्राउले कानुनभन्दा माथि कोही हुँदैन भन्ने सन्देश प्रवाह गरेको छ र आम नागरिकमा न्यायप्रति आशा जगाएको छ।
