बाँकेको राप्ती सोनारी गाउँपालिका–३ स्थित नारायणपुरदेखि दाङको सिमाना कुसुमपारी भवानीपुरसम्म हुलाकी सडक विस्तारको काम सुरु भएको छ। हुलाकी राजमार्ग निर्देशनालय, योजना कार्यालय नेपालगञ्जले यो परियोजना अघि बढाएको हो।
कार्यालय प्रमुख लीलाबहादुर भण्डारीका अनुसार दाङ, बाँके र बर्दिया खण्डको ७५ किलोमिटर सडकमध्ये ३६ किलोमिटर मार्गको ट्रयाक खोल्नुपर्नेछ। यस खण्डमा २० वटा पुल निर्माण गरिनेछन्। दाङतर्फ २२ किलोमिटर सडक र १७ पुल निर्माणका लागि रु २९ अर्ब स्रोत सुनिश्चित भएको छ।
भण्डारीले अधिकांश सडकको टेण्डर प्रक्रियामा रहेको बताए। परियोजना तीन वर्षभित्र सम्पन्न हुनेछ। यो सडकले महेन्द्र राजमार्गको वैकल्पिक मार्गको काम गर्नेछ। यसको मुख्य उद्देश्य जिल्ला सदरमुकामलाई पूर्व–पश्चिम जोड्नु हो। यसले पिछडिएका क्षेत्र र स्थानीय समुदायलाई विकासको मूलधारमा ल्याउनेछ।
सडक विस्तारका क्रममा करिब १५ किलोमिटर घना जङ्गल पर्नेछ। वातावरणीय प्रभाव मूल्याङ्कन र विस्तृत परियोजना प्रतिवेदन (डिपीआर) सम्पन्न भइसकेको छ। सडकको चौडाइ १२ मिटर रहनेछ। नौ मिटर अस्फाल्ट प्रविधिमा कालोपत्र गरिनेछ। असार ३१ गतेसम्म सूचना प्रकाशनपछि असोज महिनाबाट काम सुरु हुनेछ।
हुलाकी राजमार्ग यस क्षेत्रको विकासको मेरुदण्ड बन्नेछ। समाजसेवी पोषण केसीले गुणस्तरीय सडक अभावमा ग्रामीण क्षेत्र पछाडि परेको बताए। सडक निर्माणले जनताको जीविकोपार्जनमा सघाउ पुग्नेछ। उनले सडक बनेपछि यस क्षेत्रको आर्थिक तथा सामाजिक रूपमा कायापलट हुने विश्वास व्यक्त गरे।
राप्तीसोनारी गाउँपालिका–१ का अध्यक्ष यमबहादुर खड्काले सडक विस्तारको खबरले स्थानीय जनतामा खुसियाली छाएको बताए। सडक बनेमा ग्रामीण क्षेत्रका कृषि उपजको बजारीकरण, शिक्षा र स्वास्थ्य सेवामा पहुँच विस्तार हुनेछ।
