बेनीस्थित म्याग्दी नदीमा मनसुनको बाढी, पहिरो र डुबानजस्ता विपद्को जोखिम टार्न नेपाली सेना, नेपाल प्रहरी र सशस्त्र प्रहरी बलले संयुक्त प्रतिकार्य अभ्यास प्रदर्शन गरेका छन्। सुरक्षा निकायबीचको समन्वय, तयारी र क्षमता परीक्षण गर्ने उद्देश्यले यो अभ्यास गरिएको हो।
अभ्यासमा बाढीमा फसेकालाई डुंगाले उद्धार गरियो। डोरीको सहायताले उद्धार गरियो। घाइतेलाई प्राथमिक उपचारपछि सुरक्षित स्थानमा सारियो। पहिरो र डुबान प्रभावित क्षेत्रमा उद्धार टोली परिचालनको तौरतरिका देखाइयो। आधुनिक उद्धार सामग्रीको प्रयोगसमेत गरियो।
सुरक्षा अधिकारीहरूले नदी किनार र पहिरो जोखिम क्षेत्रमा सतर्क रहन आग्रह गरे। विपद्का बेला हल्लाको पछि नलागी आधिकारिक सूचनामा विश्वास गर्न अनुरोध गरे। आवश्यक परे तत्काल सुरक्षा निकायलाई खबर गर्न आग्रह गरियो।
हरेक वर्ष मनसुनले जनधनको क्षति पुर्याउँछ। पूर्वतयारीस्वरूप यस्ता अभ्यासलाई प्रभावकारी मानिएको छ। स्थानीयवासी र सरोकारवाला निकायको उपस्थितिमा अभ्यास गरियो। यसले विपद् व्यवस्थापनमा सुरक्षा निकायको तयारी र क्षमता प्रस्तुत गर्यो।
