वीरगञ्ज भन्सार कार्यालयले चालु आर्थिक वर्षको १० महिनामा १ खर्ब ९९ अर्ब ४० करोड रुपैयाँ राजस्व संकलन गरेको छ।
भन्सार विभागले यस अवधिमा कार्यालयलाई २ खर्ब २३ अर्ब १८ करोड रुपैयाँ राजस्व संकलन गर्ने लक्ष्य दिएको थियो।
संकलित राजस्व लक्ष्यको ८९.३५ प्रतिशत मात्र रह्यो। तर, सूचना अधिकारी उदयसिंह विष्टले यसलाई सन्तोषजनक बताएका छन्।
विष्टका अनुसार, पेट्रोलियम पदार्थ, सवारीसाधन र तिनका पार्टपुर्जा आयात राजस्वका मुख्य स्रोत हुन्।
विभागले वर्षभरिमा कार्यालयलाई २ खर्ब ७३ अर्ब ३९ करोड रुपैयाँ राजस्व संकलन गर्ने लक्ष्य दिएको छ।
चालु आर्थिक वर्षको अझै दुई महिना बाँकी रहेकाले थप राजस्व संकलन हुने कार्यालयको अपेक्षा छ।
कार्यालयले साउनमा १८ अर्ब ४४ करोड, भदौमा २० अर्ब ७३ करोड राजस्व संकलन गर्यो। असोजमा १९ अर्ब नौ करोड, कात्तिकमा १७ अर्ब ३३ करोड उठायो। मङ्सिरमा २० अर्ब ८० करोड रुपैयाँ राजस्व प्राप्त भयो।
पुसमा २० अर्ब २० करोड, माघमा १८ अर्ब ९२ करोड राजस्व संकलन भयो। फागुनमा १९ अर्ब ३४ करोड, चैतमा २२ अर्ब ८२ करोड उठ्यो। वैशाखमा २१ अर्ब ७४ करोड रुपैयाँ राजस्व प्राप्त भएको विष्टले जानकारी दिए।
