वीरगञ्ज चिनी मिल सञ्चालनको सम्भाव्यता अध्ययन गर्न सरकारले गठन गरेको कार्यदलले स्थलगत निरीक्षण गरेको छ। उद्योग, वाणिज्य तथा आपूर्ति मन्त्रालयका सिनियर डिभिजनइञ्जिनियर (सिडिई) श्रीकान्त यादवको संयोजकत्वमा पिपरास्थित मिलको अनुगमन सम्पन्न भयो।
कार्यदलले कारखानाको भौतिक संरचना, मेसिनरी र पार्टपुर्जाको वर्तमान अवस्थाको अध्ययन गरेको छ। यी संरचनाहरूको उपयोगको सम्भावनाबारे पनि अनुगमन गरिएको संयोजक यादवले बताए।
सरकारले गत भदौ १ गते यो कारखाना पुनःसञ्चालनको सम्भाव्यता अध्ययन गर्न कार्यदल गठन गरेको थियो। आपूर्ति मन्त्रालयका शाखा अधिकृत ज्योति पौडेल र मन्त्रालयका सल्लाहकार श्याम शर्मा सदस्य छन्।
विज्ञापन
कार्यदलले १५ दिनभित्र कारखानाको वर्तमान अवस्थाको विस्तृत अध्ययन गरी पुनःसञ्चालनको सम्भाव्यता र आवश्यक कार्ययोजनासहितको प्रतिवेदन सरकारलाई बुझाउनेछ।
