ब्रोड पिक हिमपहिरो: तीन नेपालीको शव आज काठमाडौं आइपुग्दै

पाकिस्तानको ‘ब्रोड पिक’ हिमपहिरोमा साउन १४ गते ज्यान गुमाएका तीन नेपाली नागरिकको शव आज काठमाडौं आइपुग्दैछ। किली पेम्बा शेर्पा ‘किलु’, ग्यालु शेर्पा र निमा शेर्पाको शव कतार एयरवेजको उडानमार्फत अपराह्न ४:४५ बजे त्रिभुवन अन्तर्राष्ट्रिय विमानस्थलमा अवतरण गर्नेछ। परराष्ट्र मन्त्रालयले यो जानकारी दिएको छ। यसअघि सोही दुर्घटनामा निधन भएका पुरबहादुर गुरुङ ‘युक्त’ को शव साउन २१ गते नै नेपाल ल्याइसकिएको थियो। उक्त हिमपहिरोमा ६ जना नेपाली आरोहीसहित १० जनाको मृत्यु भएको थियो। दुर्घटनास्थलबाट एक नेपाली, एक पाकिस्तानी र एक अमेरिकी आरोहीको शव भने फिर्ता ल्याउन बाँकी छ।