मध्य चीनको सान्सी प्रान्तमा रहेको एक कोइला खानीमा ग्यास विस्फोट हुँदा कम्तीमा ८२ जना कामदारको मृत्यु भएको छ। शुक्रबार बेइजिङबाट करिब ५२० किलोमिटर दक्षिणपश्चिममा रहेको किनयुआन काउन्टीको खानीमा उक्त दुर्घटना भएको हो।
सरकारी समाचार एजेन्सी सिन्ह्वाका अनुसार विस्फोटको समयमा २४७ जना कामदार खानीभित्र काम गरिरहेका थिए। उद्धार कार्य जारी छ।
दुर्घटनापछि चिनियाँ राष्ट्रपति सी चिनफिङले बेपत्ताहरूको खोजीका लागि उद्धारकर्मीहरूलाई हरसम्भव प्रयास गर्न निर्देशन दिएका छन्। उनले दुर्घटनाका लागि जिम्मेवार व्यक्तिहरूलाई जवाफदेही बनाउनुपर्नेमा जोड दिएका छन्।
राष्ट्रपति सीले कार्यस्थलको सुरक्षाका बारेमा सतर्क रहन, अनुसन्धान गर्न र सबै प्रकारका जोखिमहरू तथा लुकेका खतराहरूलाई सुधार गरी ठूला दुर्घटनाहरू रोक्न आग्रह गरेका छन्। उनले वर्षायामलाई मध्यनजर गर्दै देशमा बाढी रोकथामका लागि पनि प्रभावकारी प्रयास गर्न आह्वान गरेका छन्।
घटनास्थलमा उद्धार कार्यका लागि चीनको आपतकालीन व्यवस्थापन मन्त्रालयले ३४५ कर्मचारीसहितको टोली पठाएको छ। राज्य सञ्चालित सञ्चारमाध्यमका फुटेजमा ठूलो संख्यामा उद्धारकर्ता र प्यारामेडिक्स घटनास्थलमा खटिएको देख्न सकिन्छ।
२००० को दशकको सुरुमा चीनको कोइला खानी उद्योगमा यस्ता घातक दुर्घटनाहरू सामान्य भए पनि हालका वर्षहरूमा सुरक्षा मापदण्डहरू कडा पारिएको बताइएको छ।
