दोलखाको वैतेश्वर गाउँपालिका-३ मा विद्यार्थी अभावमा बन्द हुने अवस्थामा पुगेको कालिढुङ्गा माध्यमिक विद्यालयलाई स्थानीय समुदायले ४ रोपनीभन्दा बढी जग्गा दान गरेका छन्। मिर्गेका तामाङ र थापा समुदायले विद्यालयको शाखा सञ्चालनका लागि यो सहयोग गरेका हुन्।
विद्यार्थी संख्या कम हुँदै गएपछि विद्यालय बन्द हुने चिन्ता बढेको थियो। यसलाई सम्बोधन गर्न मिर्गेमा विद्यालयको शाखा स्थापना गरिएको छ। यसले तल्लो कक्षाका विद्यार्थीलाई डेढ घण्टा टाढा मजुवा जानुपर्ने बाध्यता अन्त्य गरेको छ। देवीस्थान नजिकै स्थानीयले दान दिएको जग्गामा अस्थायी भवन निर्माण गरी पठनपाठन सुरु भएको छ।
विद्यालय व्यवस्थापन समितिका अध्यक्ष मनिक तामाङका अनुसार, पुरानो विद्यालय रहेको मजुवामा विद्यार्थी संख्या न्यून छ। मिर्गे, चिलाउने खड्गा, जैनालु र पाईले जस्ता क्षेत्रमा विद्यार्थीको उपस्थिति बाक्लो छ। स्थानीयले जग्गा दान गरेपछि बाल विकासदेखि कक्षा ७ सम्मको पढाइ सञ्चालन गर्न शाखा विद्यालयको उद्घाटन गरिएको हो।
वैतेश्वर गाउँपालिकाका अध्यक्ष छवि लामा र वडा अध्यक्ष कमल अधिकारीले शाखा विद्यालयको उद्घाटन गरे। अध्यक्ष लामाले विद्यालयको भौतिक पूर्वाधार विकासमा गाउँपालिकाले सहयोग गर्ने प्रतिबद्धता जनाए। उनले विद्यालय बचाउन स्थानीयले देखाएको सक्रियताको प्रशंसा गर्दै जग्गादाताहरूलाई धन्यवाद दिए।
गाउँपालिकाले विद्यालयका लागि आवश्यक भौतिक सुविधा र शिक्षक दरबन्दीको व्यवस्थापन गर्ने पनि उनले बताए। यस विद्यालयलाई जग्गा दान गर्ने १५ जना स्थानीयवासीमा बम बहादुर तामाङ, गंगी तामाङ, माला तामाङ, खेशर तामाङ, दुर्गा बहादुर थापा, भिम्शेन थापा, टलक तामाङ, रवि तामाङ, यम बहादुर तामाङ, निकेश तामाङ, रोलिना तामाङ, मनिक तामाङ, भिम बहादुर तामाङ, र ढाल बहादुर तामाङ छन्।
प्रधानाध्यापक पुष्कर कुमार दाहालले पुरानो विद्यालय मजुवामा ७३ जना र शाखा विद्यालय मिर्गेमा ७६ जना गरी कुल १४९ जना विद्यार्थी अध्ययनरत रहेको जानकारी दिए।
