काठमाडौँ । प्रतिनिधिसभा बैठकमा फोटो खिचेको आरोपमा नेपाली कांग्रेसकी सांसद गीतकुमारी सेन्दाङलाई सभामुख डोलप्रसाद अर्यालको आदेशबिनै मर्यादापालकले बैठक कक्षबाट बाहिर निकालेका छन्।
सांसद सेन्दाङले बैठक कक्षभित्रबाट फोटो खिचेको र सोही निहुँमा मर्यादापालकहरूले सभामुख अर्यालको अनुमति नलिई आफूलाई बाहिर निकालेको बताइन्। बाहिर निकालेपछि खिचिएको फोटो डिलिट गरेपछि मात्र उनलाई पुनः बैठकमा प्रवेश दिइएको थियो।
प्रतिनिधिसभा बैठकमा सांसदहरूले फोटो र भिडियो खिच्न नपाउने व्यवस्था छ। सभामुख अर्यालको रुलिङबिना सांसदलाई यसरी बाहिर निकाल्ने कार्य संसदीय अभ्यासमाथि प्रश्नचिह्न खडा गर्ने खालको भएको टिप्पणी भएको छ।
यसैबीच, राष्ट्रिय स्वतन्त्र पार्टी (रास्वपा) का सांसद जगदीश खरेलले प्रधानमन्त्रीको जस्तो जवाफ दिएको भन्दै कांग्रेस सांसद नरेन्द्रकुमार केरुङले नियमापत्ति जनाएका थिए। यस विषयमा सभामुख अर्यालले बैठक १५ मिनेटका लागि स्थगित गरेका थिए।
बैठकपछि पत्रकारसँग कुरा गर्दै सांसद केरुङले रास्वपा सांसद खरेलको अभिव्यक्ति संसदीय मर्यादाविपरीत रहेको र त्यसलाई रोक्न सभामुखलाई आग्रह गरेको बताए। उनले विधेयकमाथिको छलफलमा सांसद खरेलले प्रधानमन्त्रीले जस्तो जवाफ दिन खोजेको र आफूहरूले भने प्रधानमन्त्रीबाट जवाफ खोजेको स्पष्ट पारे।
