देशभर भइरहेको लगातारको वर्षाले बीपी राजमार्ग र कान्ति लोकपथसहित देशका विभिन्न मुख्य राजमार्गहरू अवरुद्ध भएका छन्। प्रहरी प्रधान कार्यालयका अनुसार राति ९:०० बजेसम्म सुरक्षा सतर्कता र पहिरोका कारण सवारीसाधन आवतजावतमा रोक लगाइएको छ।
बीपी राजमार्गअन्तर्गत खुर्कोट-नेपालथोक-कटुन्जेबेँसी क्षेत्रमा बाढीको जोखिमले बेलुका ६:०० बजेदेखि बिहान ४:०० बजेसम्म सवारीसाधन पूर्ण रूपमा बन्द गरिएको छ। बिहान ४:०० बजेदेखि बेलुका ६:०० बजेसम्म भने सञ्चालन हुनेछ।
मकवानपुरको कान्ति लोकपथमा रातिको समयमा सवारीसाधन चलाउन रोक लगाइएको छ। यहाँ बेलुका ५:०० बजेदेखि बिहान ५:०० बजेसम्म आवतजावत बन्द गरिएको छ।
इलामको मेची राजमार्गअन्तर्गत राजदुवालीमा सडक हिलाम्मे भएपछि पूर्ण रूपमा अवरुद्ध भएको छ। वैकल्पिक बाटो प्रयोग गर्न सकिनेछ।
सिन्धुपाल्चोकको भोटेकोशी गाउँपालिका-४ जिरोकिलो र वडा नम्बर २ कोदारीको इकु पहिरोमा पहिरो तथा लेदो खसेका कारण अरनिको राजमार्ग पूर्ण रूपमा बन्द भएको छ।
दोलखाको तामाकोशी गाउँपालिका-५ किर्नेटारमा खोलाले कटान गरेपछि लामासाघु-रामेछाप राजमार्ग पूर्ण रूपमा अवरुद्ध बनेको छ। खिम्ती ग्रामीण विद्युत सहकारी संस्थाको कार्यालय परिसरबाट वैकल्पिक बाटो खुलाइएको छ।
रसुवाको उत्तरगया गाउँपालिका-५ खाल्टेमा त्रिशूली नदीले सडक मुनिबाट कटान गर्दा पासाङ ल्हामु सडक खण्डको कच्ची सडक अवरुद्ध भएको छ।
मुगुको छायानाथ रारा नगरपालिका-७ झ्यारी खोलामा पहिरो खस्दा नाग्म-गमगडी सडक खण्ड पूर्ण रूपमा अवरोध भएको छ।
रोल्पाको परिवर्तन गाउँपालिका-१ खोलावाङस्थित घोराही-थवाङ सहिद राजमार्गमा सुक्खा पहिरोका कारण अवरुद्ध भएको छ।
