अविरल वर्षा र पहिरोले देशभरका १३ सडकखण्ड अवरुद्ध भएका छन्। नेपाल प्रहरीका अनुसार मध्यपहाडी लोकमार्ग, अरनिको राजमार्ग, मेची राजमार्ग, त्रिशूली–मैलुङ–स्याफ्रुबेंसी, नाग्म–गमगढी, भेरी करिडोर र सल्लेरी–लुक्ला सडकखण्ड प्रभावित छन्।
मेची राजमार्गको इलाम नगरपालिका–९ राजदुवाली सडक हिलाम्मे छ। वैकल्पिक मार्ग भने सञ्चालनमा छ। सोलुखुम्बुको खुम्बु पासाङल्हामु गाउँपालिका–१ मा सल्लेरी–लुक्ला सडक अवरुद्ध छ। तेह्रथुमको लालीगुराँस नगरपालिका–९ काडे पिङवाखोलामा मध्यपहाडी लोकमार्ग पहिरोले थुनिएको छ।
बिपी राजमार्गको खुर्कोट–नेपालथोक–कटुन्जेबेँसी सडकखण्डमा बेलुका ६ देखि बिहान ४ बजेसम्म सवारी रोक्न प्रहरीले निर्देशन दिएको छ। कान्ति लोकपथमा बेलुका ५ देखि बिहान ५ बजेसम्म सवारी चलाउन पाइँदैन।
सिन्धुपाल्चोकको भोटेकोशी गाउँपालिकाअन्तर्गत जिरोकिलो, कोदारी र लिपिङ क्षेत्रमा अरनिको राजमार्गका खण्ड अवरुद्ध छन्। दोलखाको तामाकोशी गाउँपालिका–५ किर्नेटारमा सामाकोशी खोलाले लामासाँघु–रामेछाप सडक कटान गरेको छ।
भेरी करिडोरको जाजरकोट–डोल्पा सडक र मुगुको नाग्म गमगढी सडक पूर्ण रूपमा अवरुद्ध छन्। Nmkhabarलाई स्रोतले पुष्टि गर्यो।
