एक सातामै ६३ जनामा डेङ्गी सङ्क्रमण पुष्टि भएपछि इपिडिमियोलोजी तथा सरुवा रोग नियन्त्रण महाशाखाले वर्षायाममा उच्च जोखिमको चेतावनी दिएको छ।
महाशाखाका किटजन्य रोग शाखा प्रमुख डा. गोकर्णप्रसाद दाहालका अनुसार, दैनिक वर्षाले डेङ्गी सार्ने लामखुट्टेको विकास हुने वातावरण बन्छ। आकाशबाट जमेको पानीमा लामखुट्टेले फूल पार्छन्, जसले सङ्क्रमणको खतरा बढाउँछ।
डा. दाहालले अहिले दैनिकजसो परिरहेको पानीले सडक र घर छेउछाउका खल्डाखुल्डीमा लामखुट्टेका प्रजाति विकसित हुन सक्ने चेतावनी दिए।
किटजन्य रोग शाखा प्रमुख डा. दाहालका अनुसार, डेङ्गी सङ्क्रमणको जोखिम असारदेखि कात्तिकसम्म उच्च रहन्छ। सफा पानी जम्ने ठाउँमा ‘एडिज एजिप्टी’ र ‘एडिस एल्बोपिक्टस’ प्रजातिका लामखुट्टेले फूल पार्छन्।
ती फूलबाट लार्भा निस्कन्छ र वयस्क भएपछि मानिसलाई टोकेर डेङ्गी रोग सार्छ। लामखुट्टेले फूल पार्ने सम्भावित ठाउँहरू पहिचान गरी नियमित सरसफाइमा विशेष ध्यान दिनुपर्छ।
डेङ्गीबाट बच्न घर वरिपरिका खल्डाखुल्डीमा पानी जम्न नदिन, नियमित सरसफाइ गर्न र सुत्ने बेला झुल प्रयोग गर्न डा. दाहालले सुझाव दिएका छन्।
