काठमाडौं उपत्यकासहित देशको मध्य र पूर्वी भेगमा रातिदेखि नै हल्कादेखि मध्यम वर्षा भइरहेको छ। यसको विपरीत, पश्चिम तराईका केही स्थान अत्यधिक गर्मी र तातो लहरको चपेटामा परेका छन्।
हाल नेपालमा पश्चिमी वायु, स्थानीय वायु तथा पूर्वी भू-भाग नजिक रहेको न्यून चापीय क्षेत्रको संयुक्त प्रभावले मौसम प्रभावित भएको छ। मौसम पूर्वानुमान महाशाखाका अनुसार सुदूरपश्चिमबाहेक देशका अधिकांश भागमा दिनभरजसो पानी पर्ने र रोकिने क्रम जारी रहनेछ।
आज दिउँसो कोशी, मधेश, बागमती र गण्डकी प्रदेशका पहाडी तथा हिमाली भेगमा आंशिक बदली रहनेछ। कोशी, बागमती र गण्डकी प्रदेशका हिमाली र पहाडी क्षेत्रका केही स्थानमा तथा मधेश, कोशी, बागमती र गण्डकी प्रदेशकै तराईका भू-भागमा मेघ गर्जन र चट्याङसहित मध्यम वर्षाको सम्भावना छ। उच्च हिमाली क्षेत्रमा हिमपातको समेत सम्भावना देखिएको छ। यो क्रम राति पनि जारी रहने र केही स्थानमा चट्याङसहित वर्षा हुने अनुमान छ।
पूर्वमा पानी परेर मौसम चिसो भइरहेका बेला सुदूरपश्चिम, लुम्बिनी र कर्णाली प्रदेशका तराई क्षेत्रमा तापक्रम ४० डिग्री सेल्सियसभन्दा माथि पुगेको छ। दिपायल, धनगढी र नेपालगञ्जको तापक्रमले यो सीमा नाघेको छ।
मौसम विभागले सुदूरपश्चिम प्रदेशका पहाडी तथा तराई भेगमा ‘तातो लहर’ (सुख्खा र तातो हावा) चल्ने सम्भावना औंल्याएको छ। लुम्बिनी प्रदेशका पहाडी तथा तराई भेगमा ‘तातो दिन’ हुने भएकाले आवश्यक सतर्कता अपनाउन भनिएको छ। लुम्बिनी, सुदूरपश्चिम र कर्णाली प्रदेशमा तत्कालै ठूलो वर्षा हुने सम्भावना नरहेको महाशाखाले जनाएको छ।
