एन्फाका कोषाध्यक्ष र लेखा अधिकृत खेल मिलेमतो आरोपमा पक्राउ

खेलमा मिलेमतो, अनियमितता तथा ठगीसम्बन्धी कसुरमा अखिल नेपाल फुटबल संघ (एन्फा) का कोषाध्यक्ष रविन्द्र जोशी र लेखा अधिकृत सञ्जीव पाण्डे पक्राउ परेका छन्। केन्द्रीय अनुसन्धान ब्युरो (सीआईबी) ले राष्ट्रिय खेलकुद परिषद् र बसन्त रिजालको जाहेरीका आधारमा उनीहरूमाथि अनुसन्धान अघि बढाएको जनाएको छ। प्रहरीले ललितपुर जिल्ला अदालतबाट दुवै जनालाई चार दिन म्याद थप गरी अनुसन्धान जारी राखेको छ। सीआईबीले आइतबार साँझ विज्ञप्ति जारी गर्दै उनीहरूमाथि खेलमा मिलेमतो, अनियमितता र ठगी सम्बन्धी कसुरमा अनुसन्धान भइरहेको पुष्टि गरेको थियो। आइतबारै जिल्ला अदालत ललितपुरका न्यायाधीश भगवती शर्मा ढुंगानाको इजलासले जोशी र पाण्डेलाई थप ४ दिन हिरासतमा राखी अनुसन्धान गर्न प्रहरीलाई अनुमति दिएको थियो।