श्रम, रोजगार तथा सामाजिक सुरक्षामन्त्री रामजी यादवले १६ वटा युरोपेली देशसँग श्रम सम्झौता अघि बढाउन परराष्ट्र मन्त्रालयमार्फत पहल गर्न लागिएको बताएका छन्।
बिहीबार सिंहदरबारमा बसेको प्रतिनिधिसभा अन्तर्गतको उद्योग तथा वाणिज्य र श्रम तथा उपभोक्ता हित समितिको बैठकमा मन्त्री यादवले श्रम मन्त्रालयबाट सीधा पहल गर्दा सम्बन्धित देशबाट जवाफ आउन ढिलाइ भएकाले परराष्ट्र मन्त्रालयलाई संलग्न गराउने निर्णय भएको स्पष्ट पारे। हाल नेपालको १३ देशसँग मात्र द्विपक्षीय श्रम सम्झौता रहेको छ, जबकि नेपाली श्रमिकहरू विश्वका १७८ देशमा कार्यरत छन्।
मन्त्री यादवले वैदेशिक रोजगार प्रक्रियामा भइरहेको आर्थिक ठगी र श्रम शोषण नियन्त्रण गर्ने प्रयास भइरहेको जानकारी गराए। उनले श्रमका लागि विभिन्न देशमा जाने नागरिकमध्ये ४८ प्रतिशतले व्यक्तिगत श्रम स्वीकृति लिने गरेको उल्लेख गरे। विशेषगरी, गैरकानूनी बाटोबाट विभिन्न देशमा जाने महिला घरेलु श्रमिकहरू समस्यामा पर्दा राज्यले केही गर्न नसकेको भन्दै यस्ता अवस्थालाई सम्बोधन गर्नुपर्नेमा जोड दिए।
पछिल्लो समय युद्धका कारण विदेशमा मृत्यु भएका श्रमिकहरूको शव ल्याउन केही ढिलाइ भएको स्वीकार गर्दै अब भने ढिलाइ नहुने उनले स्पष्ट पारे।
बैठकमा समिति सदस्यहरूले वैदेशिक रोजगारमा जाने नेपालीहरूलाई ठगिनबाट रोक्न राज्य गम्भीर हुनुपर्ने सुझाव दिएका थिए। मन्त्री यादवले स्थानीय तहमा नै रोजगारी सिर्जना गर्न मन्त्रालय योजनाका साथ अघि बढिरहेको धारणा राखे। समिति सभापति रहबर अन्सारीले मन्त्री यादवलाई समितिको यसअघिको निर्देशन तथा सुझावहरू हस्तान्तरण गरेका थिए।
