म्याद गुज्रिएका मैदा र मस्यौरा बेच्ने आरआरआर सहित ५ फर्मलाई ७ लाख १६ हजार जरिवाना
कागेश्वरी मनोहरास्थित आरआरआर इन्टरनेसनल ट्रेडिङ प्रालिले म्याद गुज्रिएका मैदा र मस्यौरा बेचेको पाइएपछि २ लाख ५० हजार रुपैयाँ जरिवानामा परेको छ । वाणिज्य, आपूर्ति तथा उपभोक्ता संरक्षण विभागले बजार अनुगमनका क्रममा कैफियत फेला पारेपछि उक्त फर्मलाई कारबाही गरेको हो ।
उपभोक्ता संरक्षण ऐन २०७५ को उल्लंघन गरी म्याद नाघेका वस्तु बिक्री गरेको, मूल्यसूची तथा लेबल नराखेको र खरिद बिल व्यवस्थित नगरेको पाइएपछि विभागले अनुगमनस्थलमै नगद जरिवाना असुल गरेको हो ।
यस्तै, शंखरापुरको सलम्बु फुड एन्ड बेभरेज प्रालिलाई पानीमा मूल्य र लेबल नराखेकोमा २ लाख १० हजार रुपैयाँ जरिवाना गरिएको छ । कागेश्वरी मनोहराकै श्री कृष्ण बेभरेजलाई सोही कसुरमा २ लाख १ हजार जरिवाना तिराइएको छ ।
ललितपुर सातदोबाटोको एप्पल इन्टरप्राइजेज प्रालिले लेबल नियम पालना नगरेको भन्दै ५० हजार रुपैयाँ जरिवाना पाएको छ । कोटेश्वरको शिवम् स्टोरले खरिद बिल नराखेको पाइएपछि ५ हजार रुपैयाँ जरिवानामा परेको छ ।
नगद जरिबाना बाहेक विभागले अन्य ८ व्यावसायिक प्रतिष्ठानलाई सचेत गराउँदै सामान्य निर्देशन दिएको छ ।
