सप्तरीको गजेन्द्र नारायण अस्पतालमा सुत्केरी व्यथा लागेकी महिला सडक पेटीमै बच्चा जन्माउन बाध्य भइन्। यस घटनाको आलोचनापछि अस्पतालले डा. उषा देवसहित ६ जना कर्मचारीलाई छानबिन नटुंगिएसम्म कामबाट हटाएको छ। निलम्बित हुनेमा सुरक्षा गार्ड देवकान्त झा, स्टाफ नर्स मनिषा कुमारी साह र सजन चौधरी, कास रेणु ठाकुर र स्वीपर कृष्ण मेहतर छन्।
गत मंगलबार राजविराज नगरपालिका–१४ पर्साहीकी बबिता पासवानले अस्पतालले भर्ना नलिएपछि सडक पेटीमै बच्चा जन्माएकी थिइन्। यो घटना सार्वजनिक भएसँगै व्यापक आलोचना भएको थियो। सरकारले घटनाको छानबिन गर्न एक समिति गठन गरी पठाइसकेको छ।
