म्याद गुज्रेका सिलिन्डरमा पुनः प्रयोग गरी बिक्री गर्न लागेको रिजालको भान्छा ग्यास उद्योग प्रालिलाई २ लाख ९५ हजार रुपैयाँ जरिवाना गरिएको छ। जिल्ला प्रशासन कार्यालय मोरङको नेतृत्वमा खटिएको बजार अनुगमन टोलीले उद्योगको अनुगमन गर्दा यो कैफियत फेला पारेको थियो।
बुढीगंगा गाउँपालिका–५ मा सञ्चालित उद्योगका १९ वटा सिलिन्डरको तौल परीक्षण गर्दा एउटामा २४० ग्राम कम तौल भेटिएको थियो। मापदण्ड विपरीत म्याद गुज्रेका दुई वटा सिलिन्डरमा समेत सिल लगाई बिक्रीका लागि तयारी अवस्थामा राखिएको पाइएको थियो।
अत्यावश्यक सेवा ऐन अन्तर्गतको उक्त ग्यास उद्योगले कानुन विपरीत सुरक्षा संवेदनशीलतामा खेलबाड गरेको भन्दै जरिवाना गरिएको हो। दुई सिलिन्डरको सिल तोडी नष्ट गरिएको जिल्ला प्रशासन कार्यालय मोरङले जनाएको छ।
यस्तै, विराटनगर महानगरपालिका–३ स्थित कन्चनश्वर ग्यास पसललाई अनुगमन कार्यमा असहयोग गरेको भन्दै १५ हजार रुपैयाँ जरिवाना गरिएको छ। यसअघि कोशी ग्यास उद्योगलाई कम तौलका सिलिन्डर बिक्री गरेको भन्दै २ लाख ९० हजार रुपैयाँ जरिवाना गरिएको थियो।
