उद्योग, वाणिज्य तथा आपूर्ति मन्त्री गौरीकुमारी यादवले नेपाल आयल निगमका नवनियुक्त कार्यकारी निर्देशक नागेन्द्र शाहलाई देशभर देखिएको एलपी ग्यासको अभाव तत्काल समाधान गर्न निर्देशन दिएकी छन्। मन्त्रालयमा आयोजित शपथ ग्रहण तथा पदबहाली कार्यक्रमपछि भएको भेटवार्तामा मन्त्री यादवले उपभोक्ताले ग्यास अभावका कारण सास्ती भोग्नुपर्ने अवस्थाको अन्त्य गर्न प्रभावकारी कदम चाल्न निर्देशन दिइन्।
मन्त्री यादवले ग्यास आपूर्ति व्यवस्थालाई थप नियमित, सहज र उपभोक्तामैत्री बनाउन निगमले उच्च प्राथमिकता दिनुपर्नेमा जोड दिइन्। यसैबीच, बजारमा ग्यासको कृत्रिम अभाव र कालोबजारी भएको गुनासो आएपछि उद्योग मन्त्रालयले सर्वसाधारणलाई ग्यास नपाए ९८५१११६७७३ नम्बरमा सम्पर्क गर्न आग्रह गरेको छ।
मन्त्रीको सचिवालयका अनुसार, सर्वसाधारणबाट प्राप्त जानकारीका आधारमा सम्बन्धित निकायसँग आवश्यक समन्वय गरी समस्या समाधानका लागि तत्काल पहल गरिनेछ। निगमले बजारमा ग्यास आपूर्ति र वितरण नियमित भइरहेको दाबी गरे पनि उपभोक्ताले भने ग्यास पाउन कठिन भएको गुनासो गरिरहेका छन्।
