यातायात व्यवस्था विभागले तत्कालका लागि नयाँ सार्वजनिक सवारी साधनको दर्ता रोक्न निर्देशन दिएको छ। विभागले बिहीबार सातै प्रदेशका यातायात मन्त्रालय र स्थानीय तहलाई पत्राचार गर्दै अर्को सूचना जारी नभएसम्म दर्ता बन्द गर्न भनेको हो।
विभागका निर्देशक मणिराम भुसालद्वारा हस्ताक्षरित पत्रमा सार्वजनिक यातायातको वैज्ञानिक व्यवस्थापन नहुँदा वायु प्रदूषण, सवारी चाप र ट्राफिक जाम बढेको उल्लेख छ। इन्धनको बढ्दो मूल्यले यातायात क्षेत्रमा असहजता थपेको र सार्वजनिक हितका लागि दर्ता रोक्नु आवश्यक रहेको विभागले जनाएको छ।
सवारी तथा यातायात व्यवस्था ऐन, २०४९ को दफा २४(३) को अधिकार प्रयोग गर्दै विभागले इन्धन र विद्युतीय दुवै सार्वजनिक सवारी साधनको दर्ता रोक्न आदेश दिएको छ। सडकको स्थिति र सवारी आवागमनमा परेको कठिनाईका कारण यो व्यवस्था लागू गरिएको हो।
