पोखराको गुप्तेश्वर गुफाले जेठ १० गते आइतबार एकै दिनमा रु पाँच लाख २५ हजार ७१५ को टिकट बिक्री गरी ऐतिहासिक आम्दानी गरेको छ। यो आम्दानी गुफाको संरक्षण र शैक्षिक क्षेत्रमा लगानी गर्ने समितिको प्रतिबद्धतालाई बल पुग्नेछ।
गुफा व्यवस्थापन समितिका अनुसार, उक्त दिन चार हजार ४७२ बाह्य पर्यटक, एक हजार ४८७ आन्तरिक पर्यटक र ११९ विद्यार्थी गरी कूल छ हजार ७८ जनाले गुफाको अवलोकन गरेका थिए। गुफाभित्र ५०० मिटरमा अवस्थित प्रकृति निर्मित शिवमूर्तिको दर्शन र करिब १०० मिटरभित्रको पातले छाँगो (डेभिजफल) झरनाको दृश्यले पर्यटकलाई आकर्षित गरेको छ।
गुफा प्रवेशका लागि आन्तरिक पर्यटकलाई रु ५०, बाह्य पर्यटकलाई रु १०० र विद्यार्थीलाई रु ३५ को टिकट दर कायम छ। यान्त्रिक कामधेनु गाई र भक्तजनले चढाएको दान पनि आम्दानीका महत्वपूर्ण स्रोत हुन्।
समितिका अध्यक्ष लक्ष्मण बास्तोलाका अनुसार, तीन दशकदेखि प्रचारप्रसारमा रहेको गुफाले आम्दानीको ठूलो हिस्सा गुफाको संरक्षण, प्रवद्र्धन र शैक्षिक क्षेत्रमा लगानी गर्दै आएको छ। यसै आम्दानीबाट गुप्तेश्वर महादेव बहुमुखी क्याम्पस स्थापना भई सञ्चालनमा छ। क्याम्पसमा ८०० भन्दा बढी विद्यार्थी अध्ययनरत छन्।
गुफाको धर्मशाला हलमा कक्षा ११ सम्मको पढाइ हुने गुरुकुलसमेत सञ्चालन छ। हाल ४८ विद्यार्थी अध्ययनरत छन्। यसका साथै, आसपासका सामुदायिक विद्यालयहरूलाई पनि गुफाले आर्थिक सहयोग गर्दै आएको छ। अध्यक्ष बास्तोलाले गुफाले वार्षिक छदेखि सात करोड रुपैयाँसम्म आम्दानी गर्ने गरेको बताए।
गुफा परिसरमा मुस्ताङबाट ल्याइएको १०.८ ग्रामको शालिग्राम, बूढानीलकण्ठको मूर्ति र प्रवेशस्थलमा निर्माण गरिएका नवग्रह पनि पर्यटकका लागि आकर्षणका केन्द्र हुन्।
गुफा कार्यालय प्रमुख नारायण पौडेलले गर्मी बढेसँगै पोखरामा पर्यटकको चाप बढेको बताए। पोखरा आउने पर्यटकले गुफा नआई भ्रमण अधुरो रहेको महसुस गर्छन्। छ हजार क्षमता रहेको गुफामा भीड बढेपछि व्यवस्थापनमा चुनौती थपिएको छ।
