झापाको हल्दीबारी गाउँपालिकाले बजार अनुगमनका क्रममा हल्दीबारी–४ को बडावारी क्षेत्रका २० भन्दा बढी किराना, हार्डवेयर, कपडा, खाजा घर र सैलुन व्यवसाय बिनादर्ता र आवश्यक कानुनी कागजातबिनै सञ्चालन भइरहेको फेला पारेको छ। गाउँपालिकाले त्यस्ता व्यवसायलाई आगामी २५ गतेभित्र दर्ता गरी आवश्यक प्रक्रिया पूरा गर्न निर्देशन दिएको छ।
गाउँपालिकाले मूल्यसूची, होल्डिङ बोर्ड, बिल÷रसिदजस्ता कानुनी कागजातहरू पनि सोही अवधिभित्र पेस गर्न भनेको छ। बुधबार भएको अनुगमनपछि यो निर्देशन जारी गरिएको हो।
गाउँपालिका उपाध्यक्ष लक्ष्मीदेवी मैनालीले बजारलाई व्यवस्थित बनाउने र उपभोक्ता अधिकारको संरक्षण गर्ने उद्देश्यले अनुगमन अभियानलाई निरन्तरता दिइने बताइन्। उनले सबै व्यवसायलाई कानुनी दायरामा ल्याउनु गाउँपालिकाको उद्देश्य रहेको बताइन्।
निर्धारित समयसीमाभित्र दर्ता तथा आवश्यक प्रक्रिया पूरा नगर्ने व्यवसायमाथि प्रचलित कानुनअनुसार कारबाही गरिने गाउँपालिकाले जनाएको छ। उपाध्यक्ष मैनालीको नेतृत्वमा भएको अनुगमन टोलीमा प्रमुख प्रशासकीय अधिकृत मानबहादुर वन, गाउँपालिकाका विभिन्न शाखा प्रमुख, सुरक्षाकर्मी र स्थानीय उद्योग वाणिज्य सङ्घका प्रतिनिधिलगायतको सहभागिता थियो।
