ग्यास्टिकको सामान्य औषधि प्यान्टाप्राजोल बजारमा प्रतिट्याबलेट आठ रुपैयाँमा पाइन्छ। तर, स्वास्थ्य बिमाले त्यसको १.५६ रुपैयाँ मूल्य तोकेको छ। भरतपुर अस्पतालले बोलपत्रमार्फत खरिद मूल्यमा २० प्रतिशत नाफा जोडेर बिक्री गर्दा पनि बजार मूल्यभन्दा आठ गुणा बढी फरक देखिन्छ।
प्रोस्टेटका बिरामीले प्रयोग गर्ने सिलोडोसिन ८ एमजीको बजार मूल्य ३५ रुपैयाँ पर्छ। स्वास्थ्य बिमाले त्यसको सात रुपैयाँ मात्र मूल्य तोकेको छ। कोलेस्ट्रोलका लागि रोजोभास्टिन २० एमजीको खुद्रा मूल्य ३८ रुपैयाँ छ। बिमाले ३.३८ रुपैयाँ र अस्पतालले १.७२ रुपैयाँ तोकेको छ।
कलेजोको औषधि युविलिक ३०० एमजीको बजार मूल्य ४० रुपैयाँ छ। बिमाले ४.०५ रुपैयाँ र अस्पतालले ११.२६ रुपैयाँमा बिक्री गर्छ। दमका बिरामीको सेरिडिल २५० रोटा क्यापको बजार मूल्य ६०८ रुपैयाँ छ। बिमाले ३२३.४० रुपैयाँ र अस्पतालले ३७७.९० रुपैयाँ मूल्य तोकेको छ।
मधुमेहका बिरामीको इन्फाग्लिप्टिन २५ एमजीको बजार मूल्य ३० रुपैयाँ छ। बिमाले १०.५० रुपैयाँ र अस्पतालले १६.९५ रुपैयाँमा बिक्री गर्छ। भिटामिन बी १२ का लागि मिथायल कोवालामिन १५०० एमजीको बजार मूल्य १९.८० रुपैयाँ छ। बिमाले २.७० रुपैयाँ र अस्पतालले १०.५३ रुपैयाँमा बिक्री गर्छ।
भरतपुर अस्पतालका मेडिकल सुपरिटेण्डेण्ट डा. विश्ववन्धु बगालेले बीमाको दररेटमा औषधि बिक्री गर्न कठिन हुने बताए। उनले बोलपत्रमा खरिद मूल्यमा २० प्रतिशत नाफा जोडेर आउने मूल्य वा बीमाले तोकेको मूल्यमध्ये जुन सस्तो छ, सोही आधारमा बिमाका बिरामीलाई औषधि बिक्री गर्ने गरेको बताए। डा. बगालेले अस्पताल आएपछि खरिद मूल्यमा २० प्रतिशतभन्दा बढी नाफा नहुने गरी दररेट निर्धारण गरेकाले केही औषधिमा बिमाले तोकेकोभन्दा सस्तो दरमा बिक्री गर्न समस्या हुने गरेको उल्लेख गरे।
नेपाल औषधि उत्पादक सङ्घ (एपोन) का महासचिव सन्तोष बराल बजार मूल्यभन्दा सस्तोमा औषधि बिक्री गर्दा नोक्सान हुने बताउँछन्। उनले उत्पादक, थोक बिक्रेता र खुद्रा बिक्रेताको शृङ्खला पार गर्दा लागत मूल्य कम हुने औषधिको बजार मूल्य महँगो हुने गरेको गुनासो आउने गरेको बताए। औषधिको नियमन र बजार मूल्य सरकारी निकायबाट तय हुने व्यवस्था छ।
